Qəhrəmanımın yaşı az olsa da, daxili aləmi, iç dünyası, baxışları çox zəngindir. Standart heç nəyi sevmir. Fərqlilik onun həyat tərzidir. Əli qələm tutan vaxtlardan yazmaq və hesablamaqla arası olmasa da, müxtəlif şəkillər çəkər, evdə olan bütün əşyaları özünün titrək, zərif əlləri ilə tərənnüm etdirərdi. Ətrafdakılara özünü təsdiq etdirmişdi. Hamı onu rəssam kimi qəbul etmişdi. Allahın vergisi idi bu balaca qızın zərif barmaqları arasından rəngbərəng qələmlərlə süzülüb gələnlər - ev, güldan, saxsı qab, meyvələr, heyvanlar və s.
Məktəb illəri əlbəttə ki,dərslərinə laqeyd deyildi. Gəncə şəhər 24 saylı orta məktəbdə ilk qədəmlərini atmışdı. Təcrübəli, tələbkar Səidə müəllimənin dərs tapşırıqlarını yerinə yetirməyə çalışsa da, əsas fikri rəsm dərslərində olardı. Bütün diqqəti özünə yönəldə bilirdi. «Bu qız gələcəyin əsl rəssamıdır» sözlərindən şirin heç nə yox idi onun üçün. Sonradan oxuduğu 37 saylı orta məktəbin kollektivi də onun fərqliliklərini hiss etmişdi. Ailə üzvlərinin, müəllimlərinin, sinif yoldaşlarının, ən əsası isə özünün istəyi ilə 9-cu sinif şagird Türkan Əliyeva sənədlərini Gəncə Humanitar Kollecinin dizayn fakültəsinə verdi.Qabiliyyət imtahanında verilmiş tapşırığın öhdəsindən məharətlə gələrək test imtahanından topladığı müvafiq bal ilə istədiyi kollecin, istədiyi fakültəsinin tələbəsi oldu. Arzularının reallaşdığı ünvan Gəncə Humanitar Kolleci Türkan Əliyevanın arzularının reallaşdığı ünvana çevrildi. Kollecin direktoru Fəxrəddin Zeynalovun, dizayn fakültəsinin şöbə müdiri Mehparə xanımın, qrup rəhbəri Nuridə xanımın, müəllimləri – Şəhla xanımın, Gülçin xanımın xüsusi diqqəti ona bu sənətin incəliklərini öyrənmək şansı verdi.
Əvvəlcə adi karandaş, sonra isə yağlı boyalarla işləyən və bütün əl işlərində zövq alan Türkan Əliyeva onu vaxtında düzgün istiqamətləndirən hər kəsə, bu gün dizayn sənətinin incəliklərini başa salan müəllimlərinə xüsusi minnətdardır. Tezliklə sərgi açacağını düşünən və bu məqsədlə yorulmadan ən müxtəlif əsərlər üzərində işləyən, ətrafında gördüyü bütün əşyalara dizayn verən Türkanın tezliklə bu sahədə daha böyük uğurlara imza atacağına şübhəmiz yoxdur.
Yolun açıq olsun, gənc dizayner!!!
Modern.az
