Millət vəkili, Böyük Quruluş Partiyasının (BQP) sədri Fazil Mustafa həbsdə olan keçmiş həmkarı Gülər Əhmədovanın müdafiəsinə qalxıb. Modern.az-ın məlumatına görə, F.Mustafa Gülər Əhmədovanın ailəsinin onlara kömək üçün müraciət etdiklərini bildirib:
“Gülər Əhmədovanın ev dustaqlığına buraxılması barədə məhkəməyə və istinaq orqanına müraciətim bir sıra insanlada təəccüb doğurub. Əvvəlcədən münasibətin birmənalı olmayacağını bildiyimdən və bu addımı doğru və humanist addım olaraq dəyərləndirdiyimdən belə bir müraciət göndərmişəm. Burada söhbət kiminsə məsuliyyətdən azad olunmasından getmir. Törətdiyi əməl sübuta yetirilərsə məhkəmə istənilən cəzanı verə bilər və bizi məsələnin bu tərəfi qətiyyən maraqlandırmır. Azyaşlı uşağı olan, səhhətində problemlər olan keçmiş millət vəkilinin istintaq getdiyi müddətdə həbs qəti-imkan tədbirinin ev dustaqlığı ilə əvəzlənməsindən gedir. Bu cür müraciətləri istənilən siyasi və ya başqa xarakterli məhbus üçün etmişik və bundan sonra da edəcəyik. Vətənə xəyanət, qəsdən adamöldürmə, zorlama, oğurluq, quldurluq, narkotik satışı və istifadəsi kimi cinayətlər istisna olmaqla digər kateqoriyadan olan cinayətlərin törədilməsində ittiham olunan şəxslərin yaxınları tərəfindən müraciətlərə duyarsız qalmamız mümkün deyil. Nigar Yaqublu, Tofiq Yaqublu, Əvəz Zeynallı, Qurban Məmmədov və başqa tanınmış şəxslərlə də bağlı belə müraciətimiz olub. Doğrudur, məhkəmə orqanları deputatların müraciətinə həmişə olduğu kimi hörmətsiz yanaşsalar da, biz öz insanlıq borcumuzu yerinə yetiririk. Gülər Əhmədovanın da ailə üzvlərinin müraciətinə laqeyd yanaşmamız doğru olmazdı. Həm də bilirəm ki, öz keçmiş partiya dostları bu cür müraciətlərə çəkinərək imza atmamışalr. Bu addım həm də onlara yönəlik bir çağırışdır ki, biz müxalif partiya təmsilçiləri insanlıq naminə bu müraciəti göndəririk, siz də öz partiya yoldaşınıza dar vəziyyətə düşəndə öz imzanızı belə əsirgəyirsiniz”-deyə F.Mustafa sabiq həmkarını müdafiə edib.
Anar RÜSTƏMOV
