“Milli Məclisdə komitələrin iclası sentyabrın 15-dən başlayır. Ona görə komitəyə hansı sənədlərin müzakirə olunacağı barədə indidən danışmaq tezdir”. Bu sözləri Modern.az-a açıqlamasında Təbii ehtiyatlar, energetika və ekologiya Komitəsinin sədr müavini, deputat Elton Məmmədov deyib. O, qeyd edib ki, komitənin yaz sessiyasından qalan qanun layihələri yoxdur. “Plenar iclaslar çərçivəsində işlər planında nəzərdə tutulan məsələlər hamısı qəbul olunub. İndi hamımız məzuniyyətdə olduğumuz üçün komitəyə hansı sənədlərin daxil olmasından xəbərsizik. Ümumi işlər planın işlənməsinə sentyabrın 15-dən başlanılacaq, plenar iclasa qədər həm qanunvericilik təşəbbüsü ilə gələn sənədlərdən həm də komitələrdə hazırlanan qanun layihələri ilə bağlı müzakirələr gedəcək. Lakin ondan sonra bu haqda danışmaq olar”.
