“Seçkilərin şəffaf keçirilməsi və müdaxilənin yol verilməzliyi ilə bağlı bir sıra tədbirlər nəzərdə tutmuşuq. Bunların arasında polislərin təlimatlandırılması da var”. Modern.az xəbər verir ki, bu sözləri MSK rəhbəri Məzahir Pənahov deyib.
MSK və Prezident Adminstrasiyasının iştirakı və ATƏT-in təşkilatçılığı ilə keçirilən "Seçkilərdə müdaxilənin yolverilməzliyinin vacibliyi" seminarından sonra ATƏT-in Bakı ofisinin rəhbəri Koray Tagay və MSK sədri Məzahir Pənahov jurnalistlərin suallarını cavablandırarkən MSK sədri bildirib ki, hər il olduğu kimi bu il də Mərkəzi Seçki Komissiyası seçkilərdə şəffaflığın və qeyri-qanuni müdaxilənin yolverilməzliyinin təmin edilməsi üçün bir sıra təlimlərin keçirilməsini nəzərdə tutub. “Dairə və məntəqə seçki komissiyaları üzvlərinin öz işlərini Seçki Məcəlləsinə uyğun olaraq həyata keçirməsi və qanunvericiliyin tələblərinə əməl edilməsi üçün təlimlər keçirəcəyik. Bu kimi təlimləri polis işçilərinə, məntəqələrin təhlükəsizliyinin təmin olunmasında iştirak edəcək olan DİN əməkdaşları ilə də keçməyi düşünürük. 2003-cü ildən sonra seçki günü polislərin səsverməyə müdaxiləsi ilə bağlı şikayətlər əhəmiyyətli dərəcədə azalıb. Bu onlara keçdiyimiz təlimlərin nəticəsidir. Seçki məcəlləsinə uyğun davranmaları və qanunvericiliyin müvafiq tələblərinə əməl etmələri keçirdiymiz təlimlərin nəticəsidir", – -deyə MSK rəhbəri vurğulayıb.
Aqşin KƏRİMOV
