Türkiyə Futbol Federasiyası (TFF) ötən gün “İmperator” ləqəbi ilə ad çıxarmış Fateh Terimlə rəsmən müqavilə imzaladı. İndi hər kəsi belə bir sual maraqlandırır: Türkiyə futbolu keçmiş şöhrətini qaytara biləcəkmi? Modern.az eyni sualı ölkəmizin tanınmış idman mütəxəssislərinə ünvanlayıb.
Vaqif Sadıxov: “Türkiyə milli komandasının şəxsiyyətə ehtiyacı var, böyük bir şəxsiyyətə. Hesab edirəm ki, tamamilə düz qərar qəbul olunub. Elə düşünürəm ki, bu gün Türkiyə futbolunu yüksək səviyyəyə qaldıra bilən şəxsiyyət varsa , o da Fateh Terimdir”.
Şahin Diniyev:
“Fateh Terim böyük psixoloqdur, böyük məşqçidir. Yəni psixoloji cəhətdən milli komandanı hazırlamaq gücündədir. Elə düşünürəm ki, komandanı irəli aparmaq üçün onda böyük bir güc var. Amma hazırda çətin bir məqamdır, heyətin əksəriyyətini gənclər təşkil edir. Terim böyük bir dəyişiklik edə bilməyəcək”.
Ağasəlim Mircavadov: “Bu cür ölkələrin yığmalarının baş məşqçilərinin hamısının yaşı 55, 60, 65-dir. Bu da təsadüfi deyil. Belə ki, bu cür məşqçilər öz işlərini çox mükəmməl bilirlər. Belə ölkələr də öz məşqçilərinin qədrini yaxşı bilirlər. Bu çox yaxşı haldır. Mən gözləyirdim ki, bu posta Fateh Terim gətirilməzsə, Şenol Günəş kimi tanımış, öz işinin peşəkarı olan mütəxəssislər gətiriləcək. Elə düşünürəm ki, Terimin təyinatı Türkiyə millisinə çox xeyir verəcək. İndi bu addımı alqışlamaq lazımdır, “İmperator”dan uğur gözləməyə dəyər”.
Abbas Qəmli
