Açıq Cəmiyyət Partiyasının (ACP) lideri Rəsul Quliyev professor Cəmil Həsənlinin Milli Şuranın yeni vahid ehtiyat namizədi seçilməsinə etiraz edib. Modern.az-ın məlumatına görə, eks-spiker Milli Şuranın dünən keçirilən iclasında qəbul edilən qərara qarşı çıxaraq, Cəmil Həsənlinin prezidentliyə layiq olmadığını deyib. R.Quliyev üzünü Milli Şura üzvlərinə tutaraq deyib:
“Cəmil müəllim barəsində yazılanların onun xarizmatik liderliyinə dəlalət etdiyini düşünürsə, vay Azərbaycan xalqının halına. Heç bir uğur olmayan yerdə 15 il müavin işləyən adam prezidentlik iddiasına düşə bilməz. Parlamentə 2 dəfə deputat seçilməsi mənim dediyim kimi onun hansı səviyyədə müxalifət olduğunun göstəricisidir.
Mənim şəxsən Cəmil müəllimə hörmətim var. Ona hörmət etdiyim üçün istəmirəm kiminsə tamaşasında komik və epizodik rol oynasın. Bəs siz nə istəyirsiniz, demək istəyirsinizki o prezidentliyə ideal namizəddir? Bizim düşünmə miqyasımız və reallığa qiymət vermək imkanlarımız çox fərqlidir. Cəmil müəllimin təbliğat işini təşkil edib prezident seçkilərini udmaqda uğurlar arzulayıram”-deyə eks-spiker bildirib.
Anar RÜSTƏMOV
