“Cəmil Həsənli Rüstəm İbrahimbəyovdan daha uğurlu seçimdir”. Modern.az-ın məlumatına görə, bu fikirləri REAL hərəkatının Məclis sədri Erkin Qədirli bildirib.
REAL hərəkatının təmsilçisi bildirib ki, Cəmil Həsənli Rüstəm İbrahimbəyovdan çox səs toplamağa qadirdir.
“Cəmil Həsənli çox dəyərli insan, görkəmli alim, millətə canı yanan vətəndaşdır. Madam ki, siyasi liderlərin heç biri iddia etmədi, ilk dəfədən onun namizədliyində israr etmək lazım idi. Heç şübhəsiz, Cəmil Həsənli Rüstəm İbrahimbəyovdan daha uğurlu seçimdir. Cəmil bəyin Rüstəm bəydən daha çox səs toplayacağı aydındır. Cəmil bəy Azərbaycanı daha yaxşı tanıyır, milləti daha yaxşı duyur, problemlərini daha yaxşı anlayır. Millətin dilini də daha yaxşı danışır. Elə məhz buna görə, bir də gördün, iqtidar Cəmil bəyi deyil, Rüstəm bəyi qeydiyyata aldı. Çünki Cəmil bəydən fərqli olaraq Rüstəm bəy bu iqtidar üçün daha rahat rəqibdir. Təbii ki, bu məqsədlə bu iqtidar Rüstəm bəyin hüquqi problemlərinə də göz yuma bilər. Belə riskləri də göz önünə gətirmək vacibdir. Ehtiyat vahid namizəd yanaşması isə bu baxımdan uğurlu deyil. Hər halda Cəmil bəyin qeydiyyata alınmasını istəyirəm, ona uğurlar diləyirəm”-deyə E.Qədirli vurğulayıb.
Anar RÜSTƏMOV
