Namidə Bingöl
Bəzən hadisələrin axarı özü ağuşuna alır adamı. Hadisələrin hansı sonluqla yekunlaşacağını proqnozlaşdırmaq isə bir qədər çətindir. İndiki durumda daha çətin olanı seçki öncəsi artan gərginlikdir. Əminliklə deyə bilərəm ki, indi çoxlarının yuxusu ərşə çəkilib. Kimi Bakı-Moskva xətti üzrə hərəkət edən qatarın vaqonlarına göz qoyur, kimi bir telefon zəngindən asılı vəziyyətdə qalıb, kimi də uzaqdan-uzağa hava limanına boylanır. O isə gəlməyəcək. Daha doğrusu, qalıb iki dövlətin qanunları arasında. Vallah, arada qalmaqdan pis heç nə yoxdu. Deyirəm, uzun illər saçını-saqqalını film çəkilişlərində ağart, çoxlarının yuxuda belə “Oskar” ala bilməməsinə rəğmən, mükafatı əldə elə, sonra da ortada qalıb saqqız çeynə.
Saqqız demişkən, yadıma saqqız köpürdənlər düşdü. Mitinq oldu e. Milli Şuranın 20-ci sahəyə nəzərdə tutulan “gizlənpaç oyunu”nu deyirəm. Guya, mitinq iştirakçılarının sayı 50 minlik heyətdən ibarət olacaqdı. Hələ, sən saydığını say, gör əraziyə təşrif buyuranların sayı nə qədər olacaq. Mitinq öncəsi şar boyda saqqız köpürdənlər qələbə bayrağını əllərinə alıb “hopstop” gedirdilər. Öncə tullanıb sonra bərəkallah demək lazımdı. Deyirəm, qabaqcadan sevinməyin də düşər-düşməzliyi olur.
Odur e, bir-birinə düşmən kəsildilər, birinin sözü digərinin boğazından keçmir. Vaxt daraldıqca, hüquqi arqumentlərin ortaya qoyulmaması müxalif partiyalar arasında əməlli-başlı çaxnaşma yaradır. Milli Şura ideyasını ortaya atıb kənardan MSK-ya sənədlərini təqdim edən cənab İbrahimbəyov yazdığı ssenarinin bu cür sonluğa yaxınlaşacağını təsəvvür etmirdi, yəqin.
Heç Cəmil Həsənli də ehtiyat namizəd olacağını təsəvvür etmirdi. Bir neçə partiya nümayəndəsi ziyalı Cəmil müəllimin namizədliyini dəstəkləsə də Azərbaycan Liberal Partiyasının (ALP) sədri Əvəz Temirxan isə deyir nə danışırsınız?! Cəmil Həsənli hara, prezidentliyə namizədlik hara. Ümidləri doğruldacaq ən real namizəd cənab İbrahimbəyovdur. Birmənalı olaraq, cənab İbrahimbəyov hamının gözünü yolda qoymaqda davam edirdi. O vaxta qədər ki.
“Gözləmişəm, gəlməmisən, mən də nişanlanmışam”. Əstəğfurulla, bunun mənə aidiyyatı filan yoxdu. Məşhur mahnının sözlərində belə deyilir. Bu gedişatla bizim cənab İbrahimbəyov üzəçıxdıya, siyasi dillə desək, inaquarasiya mərasiminə digər namizədlərdən birinin prezident seçildiyi ərəfədə gəlib çıxa biləcək, güman ki.
Öz aramızdı, heç gümanlar da özünü doğrultmadı. Bu gün gələrəm, sabah gələrəm. Bu minvalla cənab İbrahimbəyovun Bakıya gəlişi tarixin arxivinə yazıldı.
Tarixin arxivində tarixçi alim Cəmil Həsənli də qalacaq. Deyə bilmərəm ki, prezident seçiləcək, yoxsa yox. Hər halda, cənab İbrahimbəyovun araya-ərsəyə gətirdiyi qalmaqallı Milli Şura tarixin arxivində sudan çıxmış balıq kimi çapalayacaq.
Balıq demişkən, “Balıq başından iylənər”-deyirlər. Belə getsə, kinorejissor İbrahimbəyov başına topladığı dəstəni yarı yolda atacaq. Çünki bu kişi siyasəti sevmir. Qoyun kinosunu çəksin də. Yoxsa nə bilim Milli Şura belə gəldi, vahid namizəd elə getdi.
Hər halda, xatırlayırsınız. M.Ə.Rəsulzadə dövründə də, Əbülfəz Elçibəy zamanında da Milli Şura yaranmışdı. O zamankı Milli Şura daha tutarlı, daha real faktlara söykənərək mövcud təhlükəni yarıb sanballı siyasi sərlövhə ortaya qoymuşdu. İndiki durumda isə tutarlı nəsə söyləmək çətindir. Çünki tutarlı heç nə yoxdu. Mən özümdən heç nə uydurmuram ha! Siz nə danışırsınızsa mən də onlara əsaslanıb fikir yürüdürəm. Görəsən, üzəçıxdıya cənab İbrahimbəyov gələ biləcək?! Gəlsəydi xahiş edərdim ki, məni də bir filmdə baş rola çəksin. Çəkdiyi filmləri yaman çox sevirəm. Nə də olsa, o, kinorejissordu axı! Çat Danışığı Bitdi
