ABŞ, İngiltərə və Fransa Suriyaya hərbi müdaxilə edilməsi barədə birgə razılıq əldə ediblər. Modern.az türk mətbuatına istinadən xəbər verir ki, hər üç ölkənin həftəsonu gerçəkləşəcək təmasları Suriyaya hərbi müdaxilə edilməsinə bir işarədir. Müdaxilədə hava əməliyyatlarının da reallaşacağı vurğulanır. Obama administrasiyasına məxsus adının çəkilməsini istəməyən şəxsin ötən günlərdə verdiyi məlumata görə isə Bəşər Əsədin kimyəvi silahdan istifadə etməsi ABŞ-ı hərbi müdaxiləyə bir addım da yaxınlaşdırıb.
Qeyd edək ki, bir neçə gün öncə Əsəd rejiminin kimyəvi silahla üsyançılara divan tutması barədə xəbərlər yayılıb. 2011-ci ilin martında Bəşər Əsəd hakimiyyətinə qarşı başlanan mübarizə “Ərəb baharı”na yeni bir rəng qatdı. Hadisələrin səngiməməyi və Əsədin müxalif qüvvələrə müqavimət göstərməsi Suriyanı vətəndaş qarşıdurmasına sürükləyib. Ümumiyyətlə iki ildən çox davam edən toqquşmalarda 100 mindən çox insan həyatını itirib.
