Seçkilərə doğru zaman daraldıqca, namizədləri düşündürən ən böyük problemlərdən biri də puldur. Prezidentlik iddiasına olan şəxslərin hər biri seçki təşviqatını aparmaq, özünü reklam etmək, bölgələrə səfərə getmək, mətbuatda ödənişli yazılar vermək və bu kimi zəruri işlərə başlamaq üçün ilk əvvəl əllərini ciblərinə atmalı olacaqlar. Nəzərə alsaq ki, dövlət tərəfindən namizədlərə maddi yardım edilməyəcək, o zaman hər bir namizəd özü üçün ya spronsor axtarışına başlayacaq, ya da qəpik-quruş yardımlar hesabına təşviqata start verəcək.
Maraqlıdır, bir neçə müxalif partiyanın birləşdiyi Milli Şura qeydə alınacaq namizədinin seçki təşviqatını necə aparacaq? Qurumun maddi qaynarları varmı? Milli Şuranın aparıcı üzvlərində olan Eldəniz Quliyev Modern.az saytına açıqlamasında bu suallara cavab tapmağa çalışıb. Təmsil etdiyi Milli Şuranın maddi problemlərdən əziyyət çəkdiyini deyən E.Quliyev yeganə ümidlərinin xalq olduğunu bildirib.
