Bəzi Yaxın Şərq ölkələrindəki siyasi qarşıdurmalar bölgəyə səfər edən turistlərin sayı xeyli azalıb. Hətta bir müddət əvvəl Türkiyənin Taksim meydanındakı son hadisələrdən sonra həmin şəhərə gedənlərin sayında azalma müşahidə olunur. Bir neçə gün bundan əvvəl isə Ərəb Turizm Təşkilatının rəhbəri bölgədə davam edən siyasi gərginlikdən sonra turistlərin sayında azalma olduğunu etiraf edib. O, “Ərəb baharı” səbəbindən 3 milyonu Misirdə olmaqla bölgənin 10 milyon turist itirdiyini bildirib. Təşkilat rəhbərinin sözlərinə görə, turist axınının azalması nəticəsində turizm sektoruna ümumilikdə 15 milyard dollar ziyan dəyib və bu sahədə çalışan xeyli işçinin işdən çıxarıldığını qeyd edib. Təkcə Misirdə yox, bütünlüklə Şərq ölkələrində turist qıtlığı yaşayır. Artıq bir neçə ölkə vətəndaşlarına Şərqdə baş verən hadisələrlə əlaqədar həmin ölkələrə getməyi qadağan edib.
Modern.az-ın turizm şirkətləri ilə apardığı sorğudan da məlum oldu ki, həmyerlilərimizin ən çox üz tutduğu Türkiyə də daxil olmaqla Şərq ölkələrinə səfər edənlərin sayı azalıb.“Bakı-Turizm Ekskursiya” MMC-nin turizm üzrə meneceri Gülnar Eyvazova da Şərqdəki son hadisələrin turizm sektoruna təsir etdiyini etiraf etdi. Onun sözlərinə görə, Taksim hadisələrindən sonra İstanbula gedənlərin sayı sıfıra enib. “İstanbul şəhərinə gedənlərin sayı kəskin azalıb. Amma Türkiyənin Antalya, Kəmər, Bodrum kimi istirahət yerlərinə gedənlərin sayı çoxdur. Şərq ölkələrinə turist göndərmədiyimizdən turist sayında fərq olduğunu deyə bilmərik. Ərəb ölkələrindən daha çox Dubaya səyahət edilir. Amma yay fəslində həmin ölkəyə turizm mövsümü sayılmadığından hələ ki, sifarişlərin sayı azdır. Payız ayında həmin bölgəyə turist axını başlayacaq”.
“Freestyle-Safari”-nin turizm üzrə meneceri Emilya Şirinova da Misirdəki qarşıdurmalarla bağlı olaraq bütün turizm şirkətlərinə həmin bölgəyə səfərlərin qadağan olunduğunu bildirdi. “Azərbaycanda daxil olmaqla, bir çox ölkələr vətəndaşlarına Misirə getməyi qadağan edib. Ona görə də bu ölkəyə turist səfərlərinin sayında kəskin azalma var. Amma digər Şərq ölkələri turist qıtlığı yaşamır”. Bir neçə həftə əvvəl Türkiyənin Taksim meydanındakı hadisələr, indi isə Misirdə hər gün gərginləşən vəziyyət “İmprotex Transexpress” şirkətinin müştərilərini də azaldıb. Şirkətin meneceri Mahir Əhmədov deyir ki, Misir və Suriya şəhərlərinə demək olar ki, səfərlər dayandırılıb. Taksim hadisələri zamanı Türkiyəyə getmək istəməyənlər çox olsa da, indi vəziyyət düzəlib.
“Paradice Travel” şirkətinə müraciət edənlər arasında Türkiyənin mərkəzi şəhərlərinə səfər edənlər azdır. Buna baxmayaraq, Türkiyənin istirahət məkanları azəri turistlərlə dolub-daşır.
“Global Trousim”dən isə bildirdilər ki, turist sayında heç bir azalma yoxdur. Ümumiyyətlə, bu şirkətin müştəriləri arasında Şərq ölkələrinə maraq olmadığından ora səyahət edənlər də olmur. “Vətəndaşlar əsasən Avropa və Asiya ölkələrinə səfər edirlər”. Şirkətdən onu da bildirdilər ki, Türkiyəyə istirahət məqsədilə gedənlərin sayında artım var.
Gültəkin ƏLƏSGƏR
