Yeni Azərbaycan Partiyası (YAP) Müsavat başqanı İsa Qəmbərin prezidentliyə namizədlikdən imtina etməsinə öz münasibətini açıqlayıb. Modern.az-ın məlumatına görə, hakim partiyanın funksioneri, deputat Aydın Mirzəzadə İsa Qəmbərin bu addımı belə şərh edib:
“Gedirlər ki, sonradan indiki durduqları yerə geri qayıtsınlar. Bu gün saytlarda xəbər verildi ki, radikal müxalifət mövqeyində duran Müsavat Partiyasında toplantı keçirilib. Toplantıda bu ilki prezident seçkilərində namizədliyi əvvəl irəli sürülmüş partiya başqanı İsa Qəmbərin namizədliyi geri götürülüb.
Əslində getdi ki, bu ilki uğursuzluğu və hazırsızılığı başaqsının adına yazsınlar, sonradan isə geri qayıtsın. Geri qayıdacağı 2018-ci ilədək isə yenə də kimin ana müxalifət olduğu barədə sonsuz mübahisələr etmək mümkün olacaq.
Hesab edirlər ki, qəzet səhifələrində ittihamları , əhəmiyyət kəsb etməyən çoxv variantlı siyasi gedişləri ilə ciddi siyasətlə məşğul olurlar”-deyə A.Mirzəzadə deyib.
Qeyd edək ki, bu gün Müsavat divanının toplantısı keçirilib. Toplantıda başqa İsa Qəmbərin namizədliyinin Milli Şuranın yeni ehtiyat namizədi Cəmil Həsənlinin xeyrinə geri götürülməsi haqda qərar qəbul edilib.
Anar RÜSTƏMOV
