Milli Məclisin nümayəndə heyətinin seçkiöncəsi Avropa Şurası Parlament Assambleyasının (AŞPA) payız sessiyasında iştirakı təxirə salınmayacaq. Bunu Modern.az saytına açıqlamasında parlamentin AŞPA-dakı nümayəndə heyətinin üzvü Fazil Mustafa bildirib.
Deputatın fikrincə, sessiya prezident seçkilərinə təsadüf etməsinə baxmayaraq nümayəndə heyəti geniş tərkibdə iştirak edəcək: “Milli Məclisin nümayəndə heyəti AŞPA-nın sessiyasında iştirak edəcək. Kimsə prezidentliyə namizəddirsə, onlardan başqa bütün namizədlər sessiyaya qatılacaq. Artıq səfər zamanı müxtəlif tədbirlər müəyyən edilib. Ayın 4-ü, 5-i Parisdə İnsan hüquqları qanunları komitəsinin iclasında iştirak edəcəyik. Ola bilsin ki, bir-iki deputat istisna olmaqla nümayəndə heyəti səfərdə iştirak edəcək”.
