Müdafiə Sənayesi Nazirliyindən“Dəmirbank”ın iddialarına cavab gəldi. Xatırladaq ki, bank rəhbərliyi nazir Yavər Camalovun qardaşı Əlikram Camalovu məhkəməyə verib. İddiaya görə, “Hacı Camalxan” adlı Məhdud Məsuliyyətli Cəmiyyətin (MMC) direktoru olan Əlikram Camalov “Dəmirbank”a olan 3 milyon 950 min manat krediti ödəməkdən imtina edir.
Qeyd edək ki, Əlikram Camalov "Hacı Camalxan" MMC-ni kəndli-fermer təsərrüfatı kimi yaradıb. Bu qurum Şirvan şəhərində və Salyan rayonunda fəaliyyət göstərir. “Dəmirbank” qalmaqalda müdafiə sənayesi naziri Yavər Camalovun adının hallanmasına nazirlikdən laqeyd cavab gəlib. Müdafiə Sənayesi Nazirliyinin ümumi şöbəsindən Modern.az-a bildiriblər ki, bunun nazirə heç bir aidiyyatı yoxdur. “İndi heç valideyn övladına cavabdeh deyil, o ki qala qardaş qardaşına. Biz hüquqi dövlətdə yaşayırıq. Əgər nazirin qardaşının banka belə bir borcu varsa, bank onu məhkəməyə verə bilər. Borcu varsa ödəməlidir. Daha buna nazirin nə aidiyyatı? Bir də görürsən ki, Şirvanda nə baş verir, tez nazirin adına yazırlar. Nazir istehsalatla məşğul olsun, yoxsa bu kimi gülməli yazılara münasibət bildirsin? Heç bilinmir ki, Əlikram Camalov bankdan həqiqətən pul götürüb, ya yox”.
Gültəkin ƏLƏSGƏR
