“Müəllimlərin təkmilləşdirilməsi və onların bilik səviyyəsinin artırılması hər zaman bizim diqqətimizdə olmalıdır”. Modern.az xəbər verir ki, bu sözləri təhsil naziri Mikayıl Cabbarov ona yönləndirilən suallara cavab verərkən deyib. O qeyd edib ki, müəllimlərin attestasiyası atettastasiya xatirinə keçirilmir.
“Sirr deyil ki, bu gün təhsilin keyfiyyəti bizi tam qane edən səviyyədə deyil. Müəllimlərin attestasiyası, müəllimlərin səviyyə artırma və ixtisas artırma kurslarının təşkili və s. biz bu təşəbbüsləri nəzərdən keçiririk. Bu təşəbbüslər ani deyil, düşünülmüş və müəyyən müddət ərzində həyata keçriləcək. Bunun da məqsədi təhsil sistemini hansısa şoklardan qorumaqdır. Bu məsələyə kor-koranə deyil, elmi əsaslandırılmış bir yanaşma olacaq”.
Nazir eyni zamanda xüsusi istedada malik uşaqların 5 yaşının yanvar ayında tamam olması ilə verilən sualı da cavablandırıb. “Bəli, Avropa ölkələrində uşaqlar 5 yaşından tez də məktəbə başlayırlar. Amma burada nəzərə almalıyıq ki, onlar bunu öz yaşıdları ilə edirlər və onlar üçün nəzərdə tutulmuş proqramları keçirlər. Valideyinlər haqlı olaraq uşaqlarının əqli inkişafını nəzərə tutmaqla qeyd edirlər ki, onlar böyük yaşda uşaqlarla eyni təhsili ala bilərlər. Biz sağlam övladı təhsillə təmin edə bilərik. Burada tək uşağın əqli inkişafı deyil, fiziki parametrləri də nəzərə alınmalıdır. Məhz bunları nəzərə alaraq dekabrın 31-i qaydalara əsasən bir tarix kimi qeyd olunub. Bundan sonra istisnaların edilməsini nəzərdə tutmuruq”.
Aytən ƏLİYEVA
