İranın Xarici İşlər Nazirliyinin sözçüsü Abbas İraqçı Suriya lideri Bəşər Əsədin Tehrana gəlməsi ilə bağlı xəbərlərə aydınlıq gətirib. Modern.az İran KİV-nə istinadən xəbər verir ki, XİN rəsmisi Bəşər Əsədin İrana gəlməsi haqqında iddiaların səslənməsinin gülünc olduğunu bildirib.
Xatırladaq ki, Suriyaya Qərb dairələrinin hərbi müdaxiləsi gündəmə gəlib. İsrail mediası isə belə bir zamanda Suriya prezidentinin İrana qaçdığı barədə xəbərlər yayıb. Qeyd olunur ki, Əsəd Xomeyni hava limanından Tehrana gəlib. İran rəsmiləri isə vurğulayır ki, başqa ölkə rəsmilərinin qarşılanması yalnız Tehranın Mehrabad hava limanında gerçəkləşə bilər.
A. İraqçı eyni zamanda Türkiyəni də Suriya məsələsinə görə sərt tənqid edib. O qeyd edib ki, Türkiyə Suriyaya hərbi müdaxilədə iştirak etsə, bu İsrailin dövlət maraqlarına xidmət etmiş bir addım hesab olunacaq.
Aqşin Kərimov
