Gənc fəal, Harvard Universitetinin məzunu Bəxtiyar Hacıyevin seçkiqabağı təşviqat kampaniyası aparmaq istəyi ilə Mərkəzi Seçki Komissiyasına müraciət etməsi ictimaiyyətdə maraqla qarşılanıb. B.Hacıyev öz Facebook profilində prezidentliyə namizədlərə ödənişli təşviqat imkanları (örtük və profil fotolarının dəyişməsi, foto, video və status paylaşmaq və s) təklif edib. Halbuki, prezidentliyə namizədlərin təbliğatının aparılamsı üçün Kütləvi İnformasiya Vasitələri MSK-ya müraciət edə bilər. Sosial şəbəkənin Kütləvi İnformasiya Vasitəsi olmaması MSK-ya müraciətə ehtiyac yaradırmı?
Modern.az media ekspertindən münasibət öyrənib.
İnformasiya texnologiyalarının inkişafının seçki öncəsi yeni situsaiya yaratdığını deyən Zeynal Məmmədlinın sözlərinə görə, belə olan halda təcrübəyə, jurnalist etikasına, seçki qanunvericiliyə göz atanda cavabsız qala bilirsən. Amma bu halda onun MSK-ya müraciət etməsi doğrudur. “Onun davranışı o mənada doğrudur ki, o, seçki təbliğatı ilə məşğul olması ilə bağlı MSK-nı məlumatlandırır.
Bu halda onun özü faktiki olaraq kütləvi informasiya fəaliyyəti ilə məşğul olacaq. Bu fəaliyyətlə məşğul olanda media qanunvericiliyi ilə bağlı nələr varsa, ona da aid ediləcək. Bir media seçki dövründə özünü necə aparırsa, Bəxtiyar Hacıyev də fəaliyyətini ona görə qurmağa məcbur olacaq. Prinsipcə toqquşmalı vəziyyət yoxdur”. Media eksperti gənc fəalın Kütləvi İnformasiya Vasitələrində yayımlanan xəbərlərin oxunma sayının azlığına da münasibət bildirib.
“O, başqa məsələ ki, Bəxtiya Hacıyev bir iddiya irəli sürüb və bu iddia Azərbaycan şəraitində digər şərtləri nəzərə almadan atılan bir iddiadır. Sanki KİV-lərin belə bir imkanı yoxdur. Aamma onun profil səhifəsinə minlərlə insan daxil olur. Burada onu da nəzərə almaq lazımdır ki, həmin KİV-lər nə dərəcədə müstəqildir. Müstəqil şəxs özü bu seçkilərdən sonra nə dərəcədə müstəqil görünəcək? İndidən nə isə hökm vermək doğru deyil. Ancaq bütövlükdə onun vətəndaş addımı qanunvericiliyə tam uyğundur.
Əsas odur ki, o konkret kimisə təbliğ etmir, kim ona üz tutursa, onun təbliğatını aparır. Yəni bir KİV kimi davranır və belə halda o, KİV-ə çevrilir”-deyə Zeynal Məmmədli bildirib.
Gültəkin ƏLƏSGƏR
