AFFA-nın futbol üzrə milli komandanın sükanı arxasına yeni məşqçi gətirmək istəyi artıq kimsə üçün sirr deyil. Alman çalışdırıcı Berti Foqts da komandada qalmayacağını bildirib. Artıq müzakirələr başqa mövzuda gedir: bu posta gətiriləcək şəxs yerli, yoxa əcnəbi mütəxəssis olsa yaxşıdır?
Modern.az bu sualı tanınmış idman yazarlarına ünvanblayıb. Aydın Bağırov (“Qol.az” saytının redaktoru): .”Mən elə hesab edirəm ki, milliyə ən yaxşı halda Qurban Qurbanov gətirilməlidir. Millinin baş məşqçisi bu mütəxəssis olmalıdır. Azərbaycan futbol rəhbərliyi Qurban Qurbanova şans verməlidir ki, gəlsin milli komandanın baş məşqçisi olsun, “Qarabağ” komandasında qalmaq şərti ilə. Çünki bu mütəxəssis milli komandada oynayan futbolçuları çox yaxşı tanıyır. Təcrübə də göstərir ki, bizim futbolçuların mentalitetinə xarici mütəxəssislər bələd deyil. Bu həm də uzun bir vaxt aparır, faydası da olmur. Amma inanmıram ki, Qurban Qurbanov millini yaxın 5 ildə Avropa çempionatının final mərhələsinə çıxa bilər”.Natiq Muxtarlı (“Komanda” qəzetinin redaktoru): “Milli komandanın baş məşqçi postuna kimin gətirilməsindən asılı olmayaraq milli komandada heç bir uğur olmayacaq. Bunun da bəlli səbəbləri var, çünki Azərbaycanda futbolçu qıtlığı var. Yəni uğur əldə edə biləcək futbolçu yoxdur. Futbolçu məhsuldur, onu yetişdirmək lazımdır. Onu yetişdirmək üçün müəyyən şərtlər olmalıdır, infrastruktur və s. olmalıdır. Bu işlər AFFA rəhbərliyi tərəfindən həyata keçirilmir. İndi belə bir ictimai fikir formalaşıb ki, bu posta Qurban Qurbanov gətirilsə, milli uğur qazanacaq. AFFA-da artıq quyruğunun qapı arxasında olmasını bilib, ictimai fikirlər razılaşmaq fikrindədir. Yəqin Foqst gedəndən sonra milli komandanın sükanı arxasına Qurban Qurbanov gətiriləcək. O da müəyyən müddətə qədər AFFA-nın qurbanıdır. Bir ildən sonra isə bu posta onu dəvət edənlər özləri onun istefasını istəyəcəklər. Köklü dəyişikliyə nail olmaq üçün müəyyən uğur əldə etmək üçün ilk növbədə AFFA-da kadr dəyişikliyi etmək lazımdır. AFFA-ya futbolu bilən, onu inkişaf etdirmək istəyən insanlar gətirilməlidir”.
Fərid Ədalət (“Sportliqa.az” saytının yazarı): “Berti Foqts geridə qalan 5 il ərzində millimizə fiziki güc və daha cəsarətli oynamağı qazandırdı. Onun başçılığı ilə komandamız 53 oyunda 12 qələbə, 15 bərabərlik, 24 məğlubiyyətlik göstərici ilə yadda qalıb. Əlbəttə ki, mənzərə ürəkaçan deyil. Bu mənzərənin Foqtsun yerinə gələcək yeni məşqçidən sonra yaxşı mənada dəyişəcəyi də dəqiq deyil. Çünki istər yerli, istərsə də əcnəbi məşqçi milliyə gətiriləndə əlindəki oyunçulardan faydalanacaq. Ən yaxşı halda 3-4 əlavə oyunçunu komandaya cəlb edəcək ki, onların da nəticəyə ciddi dərəcədə təsir göstərəcəyi hələlik sual altındadır. Konkret olaraq hələlik yerli məşqçinin Foqtsun yerinə gətirilməsinin tərəfdarıyam. Bir çoxları Qurban Qurbanovu namizəd kimi göstərir. Amma mən bunu tez verilmiş qərar kimi qiymətləndirirəm. Qurban Qurbanov “Qarabağ”da gözəl nəticələr əldə etmiş olsa da milliyə rəhbərlik etməyi hələ tezdir. O “Qarabağ”a millidən daha çox xeyir bilər. Mən millinin 6-7 ildən sonra gözəl nəticələr əldə edəcəyini söyləyə bilərəm. Çünki hazırda klublarımızda 16-17-18 yaşlı futbolçular nəsli var ki, gözəl futbol oynayırlar. Yaxşı futbol məktəbi keçirlər. Onların dövrü çatanda nəticələrimiz daha yaxşı olacaq. Mən hətta indidən proqnoz da deyə bilərəm ki, millimiz 6-7 ildən sonra dünya reytinqində 50-60-cı pillələrə qədər yüksələcək səviyyəyə çatacaq”.
İlqar Vəliyev (“İdmanxəbər.com” saytının yazarı): “Milli komandaya Mourinyo yox, hətta futbola əlvida demiş dahi Ferquyson gəlsə belə, xeyri yoxdur. Çünki futbolçuların texniki və taktiki hazırlığı əcnəbi məşqçinin tələbatını ödəyə bilmir. Ən tələbkar əcnəbi məşqçi belə Azərbaycanda uğursuzluğa düçar olacaq. Burda başqa amillərdə var: Foqts günün daha çox hissəsini Almaniyada keçirir, yalnız millinin toplanışına bir neçə gün qalmış ölkəmizə ayaq basır. Və nə vaxt kefi düşsə, gəlib 1-2 çempionat oyununa baxıb gedir. Bu da AFFA-nın günahıdır. Yerli məşqçiyə gəldikdə isə ən azı əcnəbi məşqçiyə yaradılan şərait yerli məşqçiyə yaradılsa, ondan minimal uğurlar gözləməyə dəyər. Bunlar hamısı idarəetmənin problemidir. AFFA rəhbərliyi hesab edir ki, özümüzküdürsə, bir təhər yola verərik, yox, əcnəbidirsə onun nazı ilə oynamaq lazımdır”.
Elçin Cəlilov (“Futbolpress.az” saytının yazarı): “Azərbaycan futbolunda birinci idarəçilik dəyişməlidir. Şəffaf olmalıdır və eyni zamanda ictimaiyyətə, mediaya deyilməlidir ki, AFFA-nın yığma üzrə büdcəsi necə xərclənir. Sonra fikirləşmək olar ki, bu posta əcnəbi gəlsin, yoxsa yerli mütəxəssis. Baş məşqçini dəyişməklə futbolun inkişafına təsir göstərmək olmaz”.
Abbas Qəmli
