Avqustun 28-də Horadiz şəhərində bu il ali məktəblərə yüksək bal toplayaraq qəbul olunmuş tələbələrlə görüş keçirilib. Görüşdə Füzuli rayon İcra Hakimiyyətinin başçısı Alı Alıyev, təhsil şöbəsinin müdiri Almaz Həşimova, rayonun təhsil işçiləri və ictimaiyyət nümayəndələri iştirak ediblər.
Rayon təhsil şöbəsinin müdiri Almaz Həşimova çıxış edərək Füzulidə təhsilin bugünkü vəziyyəti, qəbul imtahanları zamanı əldə olunan göstəricilər barədə ətraflı məlumat verib. A.Həşimova bildirib ki, bu il rayon üzrə 462 məzun ali məktəblərə sənəd verib, onlardan 230 nəfəri ölkənin müxtəlif ali təhsil ocaqlarına, 150-si isə orta ixtisas məktəblərinə qəbul olunub. Ali məktəblərə sənəd verən məzunlardan 30-u 600-dən çox bal toplayıb, 8 şagird isə Azərbaycan Tibb Universitetinə qəbul olub.
Füzuli rayon İcra Hakimiyyətinin başçısı Alı Alıyev tələbə adını qazanmış bütün gəncləri təbrik edərək onlara uğurlar arzulayıb. Alı Alıyev tələbə adını qazanan gənclərə elmə, biliyə daha dərindən yiyələnməyi, yüksək ixtisaslı kadrlar kimi yetişməyi, harada olmalarından aslı olmayaraq Füzulinin adını həmişə uca tutmağı tövsiyyə edib.
İcra başçısı Prezident İlham Əliyevin rəhbərliyi altında təhsil sahəsində həyata keçirilən məqsədyönlü tədbirlərdən söz açıb, bu sahəyə göstərilən dövlət qayğısından danışıb. Alı Alıyev göstərilən diqqət və qayğının nəticəsi olaraq bu il 230 füzulili gəncin respublikanın müxtəlif ali məktəblərinə qəbul olunduğunu, bu göstəricinin ötən ilə nisbətən xeyli çox olduğunu bildirib.
Görüşdə çıxış edən gənclər göstərilən diqqət və qayğıya görə minnətdarlıqlarını bildirib, müəllim və valideynlərinin etimadını doğruldacaqlarına, bilik və elmlərə əzmlə yiyələnərək ölkəmiz üçün savadlı mütəxəssis kimi yetişəcəklərinə söz veriblər.
Görüşdə rayon İcra Hakimiyyətinin başçısı Alı Alıyev qəbul imtahanlarında yüksək bal toplayaraq tələbə adını qazanan gənclərə qiymətli hədiyyələr bağışlayıb.
Modern.az
