Özbəkistanın Səmərqənd şəhərində 9-cu Beynəlxalq “Şərq təranələri” festival davam edir. 5 gün davam edən festival çərçivəsində həm də elmi, teoretik konfranslar təşkil olunub. Konfranslarda beynəlxalq festivalın fəxri qonaqlrı da iştirak edir.
“Şərq müsiqisi ənənələri müasir mədəniyyətin timsalında” adlı müakirələrdə Özbəkistanın mədəniyyət işləri və idman naziri Minxojiddin Hocimatov, Səmərqənd şəhərinin hakimi Əkbər Şükürov, UNESKO-nun baş direktoru İrina Bokova, norveçli musiqişünas Devid Hebert, indoneziyalı sənətkar Franki Raden, Almaniyadan Qertrud Mariya və digər görkəmli musiqi və mədəniyyət xadimləri iştirak ediblər. Konfransda və müzakirələrdə Azərbaycanı Bəstəkarlar İttifaqının katibi, sənətşünaslıq üzrə fəlsəfə doktoru Lalə Hüseynova, Bakı Musiqi Akademiyasının professoru, əməkdar incəsənət xadimi Zümrüd Dadaşzadə təmsil edirlər.
“İndoneziyanın 3000 illik musiqisi: ənənələr və müasirlik”, “Ənənəvi Şərqdən müasir Qərbə qədər ”, “Şərq musiqi ənənələrini öyrənmək üslubu”, “Müasir ərəb müsiqisi” kimi məruzələrdə əsasən Şərq musiqi ənənələrinin tarixi, dünya musiqi irsinə təsirindən danışılıb. Həmyerlimiz sənətşünaslıq üzrə fəlsəfə doktoru Lalə Hüseynova “Muğam sənətinin müasir Azərbaycan musiqi mədəniyyətindəki yeri” adlı elmi məruzəsində Üzeyir Haçıbəyov ənənələrindən, Fikrət Əmirovun, Bəhram Mənsurovun əsərlərindən və müasir muğam sənətinin inkişafından danışıb. Eyni zamanda danışdığı mövzuları video roliklərlə müşayiət edib.Onun çıxışı konfrans iştirakçıları tərəfindən böyük marağa səbəb olduğundan, dünya müsiqiçilərinin Azərbaycandakı bugünkü muğam sənətinin vəziyyəti barədə suallara ətraflı cavab verib.
Qeyd edim ki, Bakı Musiqi Akademiyasının professoru, əməkdar incəsənət xadimi Zümrüd Dadaşzadə də müzakirələrdə və dəyirmi stol arxasında olan söhbətlərdə Bakıda keçirilən festivallar, o cümlədən “Muğam aləmi” festival haqqında, bəstəkar yaradıcılığında muğamın tətbiqi yollarının müxtəlifliyi barədə danışıb.
Ləman Ağayeva
