Milli Məclisin Sosial Siyasət komitəsinin sədr müavini Musa Quliyev ölkədə son maaş artəmları ilə bağlı publika.az saytına müsahibə verib. - Sosial təminatlar, əmək haqları, pensiyalar artırıldı. Bu artımlar seçki ilə bağlıdır, yoxsa, bunu əvvəldən aparılan siyasətin davamı hesab etmək olar?
- Azərbaycanda əmək haqları, pensiyalar, müavinətlər 2003-cü ildən bu yana hər il artırılır. Bu artımlar müxtəlif faizlərlə- 10, 12, 8 faizlə olub. Bunların hamısı Azərbaycanın sosial inkişafının təzahürləridir. 2000-ci illərdən bəri artan inkişaf, neft sektorunun uğurlu fəaliyyəti və bundan əldə olunan kapitalın düzgün şəkildə qeyri-neft sektoruna qoyuluşu, elektron kapitalın inkişaf etdirilməsi, yeni texnoloji avadanlıqlarının Azərbaycana gətirilməsi, tətbiq olunması, dünya ölkələri ilə uğurlu iqtisadi münasibətlərin qurulması, biznes qurulması üçün normal şəraitin yaradılması, yaxşı partnyorluğun seçilməsi iqtisadiyyatın durmadan inkişafına səbəb olan amillərdir. Baxmayaraq ki, 2008-ci ildən bu yana dünya da böyük maliyyə böhranı baş verdi və hələ də davam edir. Lakin Azərbaycan bu illərdə də çox uğurlu və əvvəlki templə inkişaf edir. Pensiyaların əmək haqlarının artırılması bu uğurun nəticəsidir. Cənab Prezident bildirib ki, 2020-ci ilə qədər bu artım davam edəcək və ən yüksək həddinə çatacaq.
- Amma bu artımların seçki qabağı siyasət olduğu iddia olunur.
- Bu, müxalifətin heç bir əsası olmayan, cılız təbliğatıdır. Mən deyərdim çirkin, vicdansız qarayaxmadır. Düzdür bu il seçki ilidir. Amma baxın, 2003-cü ildən etibarın hər il bu siyasət yürüdülür, əmək haqları artırılır, yollar çəkilir, parklar salınır, sosial obyektlər- xəstəxanalar, məktəblər inşa edilir, ümumilikdə ölkə inkişaf edir. Ölkə öz həyatını yaşayır. Əhalinin sosial rifah halı 10 ildə 10 dəfələrlə artıb. Azərbaycanın valyutası dünyanın ən güclü valyutalarından birinə çevrilib. Buna görə də azərbaycandakı həyat səviyyəsi kifayət qədər yüksək səviyyədədir. Hər bir insan öz içində əvvəlki həyatına və bu gün ki həyatına baxsın, şəxsi həyatındakı müsbət dəyişiklikləri görsün, o zaman anlayacaq. Bütün bunlar heç də seçki ilə bağlı deyil. Azərbaycanın təkcə Bakı şəhərində deyil, o biri şəhərlərində də avtomobil sıxlığı, yol trafikləri var. Bu da seçki ilə bağlıdır? Azərbaycanda bir adamın 3-4 telefonu var. Hətta Azərbaycan insanının istifadə etdiyi mobil telefon dünyanın ən bahalı telefonlarındandır. Bu da seçki ilə bağlıdır? Azərbaycanda hər evdə televizor, kondisioner, kompyuter, texniki avadlanlıqların olması da seçki ilə bağlıdır? Bu rifah halı təkcə dövlət vəzifələrində çalışanların, yaxud biznesi olanların deyil, bütün təbəqələrin həyatında var. Bunları həyatın reallıqlarında da görmək mümkündür.
- Bu istiqamətdəki sosial siyasətin bundan sonra davam edəcəyini demək mümkündürmü?
- Təbii ki, bu davamlı siyasət olacaq. Azərbaycanın apardığı həm beynəlxalq siyasət, həm dünya ölkələri arasında nüfuzu, həm uğurlu inkişaf yolunda olması, öz qonşuları, partnyorları ilə ədalətli, səmimi və vicdanlı münasibətdə olması, eləcə də bir çox məsələlər bunun belə olacağını deməyə əsas verir. Təki Allah bizi fövqəladə katastroflardan saxlasın. Ağır müharibələr, fövqəladə təbiət hadisələri olmasın. Bunlar olmayandan sonra Azərbaycanın ictimai həyatında sabitlik, iqtisadi inkişaf yolunda uğur mövcuddur. Dövlət başçısı qarşıya qoyduğu məqsədlərə addım-addım nail olur. Ən böyük məqsəd Azərbaycanı 2020-ci ildə dünyanın inkişaf etmiş ölkələri sırasına çıxarmaqdır. Onu da deyək ki, dünyada cəmi 13 dövlət özünü iqtisadi inkişaf etmiş dövlət elan edib. 14-cü inşallah Azərbaycan olacaq. Azərbaycan kosmik dövlətlər klubunun üzvüdür, BMT Təhlükəsizlik Şurasında təmsil olunur. Belə uğurlarımız çoxdur və davamlı olacaq. Xalq bu siyasəti dəstəkləyir və inanır. Kataklizmlər, fövqəladə təbiət hadisəsi olmasa 10 ildən sonra Azərbaycan dünyanın inkişaf etmiş dövlətləri sırasında olacaq və söz sahibinə çevriləcək.
Modern.az
