“Milli Şuranın prezidentliyə vahid namizədi professor Cəmil Həsənlinin vətəndaşlarımızın bu hüquqsuz vəziyyətindən nə qədər çox narahat oldugunu yaxşı bilirəm”. Modern.az xəbər verir ki, bu fikirləri AXCP sədri Əli Kərimli bildirib.
Müxalifət liderinin fikrincə, Cəmil Həsənli prezident seçkilərində qalib gələrsə atılacaq ilk addımlardan biri işçilərin hüquqlarını Əmək Məcəlləsinə uyğun şəkildə nizamlamaq olacaq:
“Qalib gələcəyi təqdirdə Cəmil müəllimin və bütövlükdə Milli Şuranın ilk addımlarından biri işçi hüquqlarını Əmək Məcəlləsinə tam uyğun şəkildə nizamlamaq olacaq. Əməkçilərin normal və təhlükəsiz iş şəraiti, istirahət hüququ təmin olunacaq, onlarla əmək müqaviləsi imzalanacaq, əməklərinə müvafiq yüksək və qanuni məvacib alacaqlar. Çalışdıqları illərdəki ödəmələr hesabına yaşlananda da normal pensiya təminatları olacaq”.
AXCP sədri daha sonra yaşadığı binanın ətrafında aparılan tikinti işlərindən narazılığını bildirib.
“Yaşadığım binanın ətrafında 4 yerdə tikinti işləri gedir. Betonqarışdıran maşınların səsləri, ətrafdakı toz-torpaq, tikintidəki hay-küy hətta gecələr də davam edir. Artıq neçə aydır ki, məhəlləmizdəki yüzlərlə ailə (yaşlılar və uşaqlar da daxil) gecələr normal yatmaq imkanından da məhrum olub. Amma bu tikintidə çalışan fəhlələrin hansı qeyri-insani şərtlər altında çalışdıqlarını görmək mənim üçün yuxarıda təsvir etdiklərimdən daha böyük əziyyətdir. Səhər saat 8-də də, 40 dərəcə istidə də, axşam saat 10-da da, hətta bəzən gecə saat 2-3-də də onlar iş başındadırlar”-deyə Ə.Kərimli vurğulayıb.
Anar RÜSTƏMOV
