Cəmil Həsənlinin Mərkəzi Seçki Qərargahı bəyanat verib. Qərargahdan Modern.az-a daxil olan məlumata görə, bildirilir:
23 avqust 2013-cü il tarixdə Müsavat Partiyasının Mərkəzi Qərargahında professor Cəmil Həsənlinin “Demokratik Qüvvələrin Milli Şurası” seçicilərin təşəbbüs qrupu tərəfindən Azərbaycan Respublikası Prezidentliyinə namizəd irəli sürülməsi ilə əlaqədar təşəbbüs qrupunun toplantısı keçirilib. Həmin təşəbbüs qrupunun professor Cəmil Həsənlinin namizədliyini irəli sürməsi ilə bağlı protokol sənədləri və prezidentliyə namizədin təsdiq olunması üçün lazım olan digər sənədlər 24 avqust 2013-cü il tarixdə saat 1250-də təşəbbüs qrupunun nümayəndəsi tərəfindən Mərkəzi Seçki Komissiyasına təqdim edilib.
Seçki Məcəlləsinin 53.6. maddəsinə əsasən “Müvafiq seçki komissiyası təqdim edilmiş sənədlərə 5 gün müddətində baxır və namizədə, onun səlahiyyətli nümayəndəsinə namizədliyin müvafiq seçki dairələri üzrə irəli sürülməsini təsdiq edən qərar təqdim edir...”.
Prezidentliyə namizədliyi irəli sürülmüş professor Cəmil Həsənlinin təşəbbüs qrupu nümayəndəsinin MSK-ya dəfələrlə müraciət etməsinə baxmayaraq, bugünədək professor Cəmil Həsənlinin namizədliyinin təsdiq edilməsi barədə məsələ müzakirə olunmayıb və müvafiq qərar qəbul edilməyib.
Professor Cəmil Həsənlinin namizədliyinin təsdiq olunması ilə əlaqədar qərarın qəbul olunması üçün son müddət bu gün – 29 avqust saat 1250-də tamam olmasına baxmayaraq, hələ də bu məsələnin MSK-nın toplantısında müzakirə olunub, müvafiq qərar qəbul edilməməsi Azərbaycan Respublikası Seçki Məcəlləsinin 53.6.-cı maddəsinin kobud şəkildə pozulması deməkdir.
Cəmil Həsənlinin Mərkəzi Seçki Qərargahı MSK-nın yol verdiyi bu kobud qanun pozuntusunu qətiyyətlə pisləyir və MSK-nı Seçki Məcəlləsinə əməl etməyə çağırır.
A.RÜSTƏMOV
