Elmi-texniki tərəqqinin zəif inkişaf etdiyi dönəmlərdə at, qatır və ulaq kimi heyvanlarla yanaşı, dəvələrdən də minik vasitəsi kimi istifadə olunması hər birimizə məlumdur. Üstəlik, hələ qədim dövrlərdə sarbanların, tacirlərin dəvə karvanı ilə müxtəlif və uzaq ölkələrə səfər etdiklərini də tarixi kitablardan oxumuşuq, filmlərdən seyr etmişik. Amma zaman keçdikcə texniki nəqliyyat vasitələri yarandığından dəvələrdən minik vasitəsi kimi istifadə öz əhəmiyyətini itirdi. Hələ qədimlərdən indiyədək bu nəcib heyvanların yunundan, ətindən, dərisindən, südündən istifadə olunur.
Vaxtilə dəvəçiliyin geniş miqyas aldığı Azərbaycanda bu heyvanların sayının ildən-ilə azaldığı müşahidə olunur.
Amma Kənd Təsərrüfatı Nazirliyinin (KTN) mətbuat xidmətinin rəhbəri Murtuzəli Hacıyev
Modern.az-a bildirib ki, hazırda ölkə ərazisində 216 baş dəvə var. Ötən illərlə müqayisədə dəvə təsərrüfatında qismən artım olub. “Dəvəçilik təsərrüfatı yalnız Qobuda saxlanılır. Təsərrüfat yaranarkən dəvələrin sayı az olsa da, hazırda təsərrüfatda 216 baş dəvə var. Ötən illərlə müqayisədə dəvələrin sayında artım olsa da, onlar heç bir ölkəyə ixrac edilmir. Heç ölkəyə dəvə idxalı da yoxdur. Qobuda fəaliyyət göstərən dəvə təsərrüfatında yalnız yerli cinslər saxlanılır”, – deyə Murtuzəli Hacıyev bildirib.
Azərbaycanda dəvələrin yununa tələbat az da olsa var. Hər dəvədən təxminən 5-6 kiloqram yun qırxmaq mümkündür. Əvvəllər yunun bir kiloqramını 10 manata alırdılarsa, indi bu rəqəm 12-13 manat təşkil edir. Dəvə yunu xalçaçılıqda istifadə edilir. Amma dəvələrin sayı ən azı 1000 baş olmalıdır ki, onlardan kifayət qədər yun qırxılsın. Dəvələrin kəsilməsi və ətindən istifadə edilməsi çox az halda müşahidə edilir.
Gültəkin ƏLƏSGƏR
