“Seyran Səxavət gərək vicdanla danışsın və tanımadığı adamlar haqqında elə fikirlər söyləməsin”. Bunu Modern.az-a açıqlamasında Musa Quliyev bildirib. Belə ki, yazıçı Seyran Səxavət “Azadlıq Radiosu”na verdiyi müsahibə qeyd edib: “Milli Məclisdə oturanların doxsan faizinin evində yediyi çörəyə and içə bilmərəm, çünki o çörək halal deyil”.
Yazıçının bu sözlərinə Milli Məclis üzvləri fərqli münasibət sərgiləyib. “Ümumiyyətlə, yaşlı yazıçının bu cür aqressiv və ədalətsiz danışmağı doğru deyil”, – deyə deputat Musa Quliyev qələm sahibini qınayıb. “Seyran Saxəvət o yaşındadır ki, milləti hər zaman birliyə, barışığa, dostluğa, humanizmə çağırmalıdır. Amma belə ürəkbulndırıcı və iyrəndirici fikirlər söyləmək hər halda bu yaşda insana yaraşmır. Hər halda Seyran Səxavətin içində müəyyən aqressiyası varsa da, onu bütövlükdə cəmiyyətə sirayət etdirməli deyil”.M. Quliyevin həmkarı Nizami Cəfərov isə bildirib ki, Seyran Səxavətin bu cür sözlər işlətməsi onun üslubudur. “Seyran Səxavət ciddi yazıçıdır, həm də köhnə dostumdur. Belə satirik məzmunda maraqlı şeylər deməsi onun üslubudur. Bu da onun hüququdur, yazıçıdır. Amma bu o demək deyil ki, bu doğrudur. Ona nə and içmək olar, nə anda ehtiyac var. Ümumiyyətlə, əgər məsələni qlobal şəkildə götürsək, çörək yeyənlərin hamısı halal edir. Ona görə də bunun nə Milli Məclisə, nə Yazıçılar Birliyinə, nə Rəssamlar İttifaqına, nə hansısa bir nazirliyə dəxli var. Amma Seyran Səxavət halalla haramı müəyyənləşdirməkdə bu dərəcədə özünü səlahiyyətli hesab edirsə və bu işi üzərinə götürüb deyirsə, mübahisə etməyin mənası yoxdur.
Düşünürəm ki, kim nə çörək yeyirsə halal yeyir. Doğru da halal yeyir, oğru da halal yeyir. Dünya yaranandan hamı halal yediyini iddia edir və heç kimin boynuna haram yediyini qoymaq olmur. Əgər Seyran Səxavət belə deyirsə, onda sübut etsin, yoxsa belə sözlə demək olmur”.
Milli Məclis üzvü, xalq şairi Sabir Rüstəmxanlı isə qeyd edib ki, Seyran Səxavət bununla kimləri nəzərdə tutduğunu və nə demək istədiyini yaxşı bilir. “Amma bilirəm ki, o bu sözü işlədəndə heç vaxt ürəyində məni düşünməz. Çünki o yaxşı bilir ki, mən ömrüm boyu halal çörək yemişəm”.
Aytən ƏLİYEVA
