Cavanlıqda çəkdiyi əziyyətin səfasını qocalanda görmək istəyənlər dövlət işində işə düzəlib yaşlaşanda 5-3 manat pensiya almaq arzusu ilə yaşayırlar. Bütün ümidlərini buna bağlayıb dövlət işində canla-başla işləyənlərdən kimi pensiya almaq xoşbəxtliyini yaşaya bilirsə, çoxlarına bu səfanı gözü dolusu görmək qismət olmur. Bu azmış kimi illərdir işlədiyi, can qoyduğu idarədən halal maaşını belə almayanlar da olur.
Modern.az-a müraciət edən Aynurə qızı Fazil Musayevanın atası da təəssüf ki, pensiya yaşına çatmayıb, halal maaşını almayanlardandır. Atasının ölümündən sonra Aynurə Musayeva atasının vaxtilə işlədiyi zavodla üz-üzə qalıb. O, Modern.az-a ərizə ilə müraciət edərək bildirib ki, atası F. Musayev “Azəralüminium” zavodunda 1977-ci ildən 2012-ci ilədək qatar tərtibatçısı vəzifəsində işləyib. Səhhəti ilə əlaqədar işdən uzaqlaşsa da, bu günə kimi işlədiyi iki ay yarımın maaşını ala bilmir. “Atam səhhəti ilə əlaqədar, daha doğrusu qəfildən özündə ağrı hiss etdiyindən iş yoldaşlarının köməyi ilə zavodun həkimə aparılıb.
Müayinədən sonra məlum olub ki, o, ağır infarkt keçirib və atamı təcili tibbi yardımın köməyi ilə Gəncə şəhər Mərkəzi Ürək Xəstəxanasına aparılıb. Bununla əlaqədar olaraq dörd ay müddətinə ciddi həkim nəzarətində müalicə olunub və 28.11.2012-ci il tarixdə ürək çatışmazlığından vəfat edib. Atam 15 il bu zavodda can qoyub. Buna baxmayaraq atama düşən qanuni 75 günlük məvacibini ala bilmirik”.
Aynurə Musayeva dəfələrlə zavod rəhbərliyinə müraciət etsə də rəhmətə getmiş atasının məvacibini ala bilməyib. “Saytınız vasitəsilə zavod rəhbərliyindən xahiş edirəm ki, atama çatası məvacibin ölümündən sonra da olsa da zavod tərəfindən ödənilməsinə köməklik göstərəsiniz”.
Gültəkin ƏLƏSGƏR
