Avropa Liqasının “pley-off” mərhələsində bu gün keçiriləcək “Ayntraxt” – “Qarabağ” oyununun canlı yayımı ilə bağlı yaranmış problem aradan qaldırılıb.
Bakı vaxtı ilə saat 23.30-dan etibarən bu matç “İdman Azərbaycan” və ya AzTV kanalından canlı nümayiş etdiriləcək. Xatırldaq ki, Bakıda keçirilən ilk qarşılaşma almanların 2:0 hesablı qələbəsi ilə başa çatmışdı. Modern.az oyunöncəsi “Qarabağ” fanatları olan yazarların rəyini öyrənib.Yazıçılar Birliyinin katibi Rəşad Məcid “Qarabağ”ın ilk oyundakı məğlubiyyətini tez buraxılan qolla əlaqələndirdi. O, səfər qarşılaşmasında “Qarabağ”a ümid etdiyin və sürpriz gözlədiyini söylədi. “Bakıda Qarabağın sadəcə bəxti gətirmədi. 6-cı dəqiqədə qol buraxmaq “Qarabağ” üçün psixoloji çətinliklər yaratdı. İlk 20 dəqiqədə qol buraxmasalar sürpriz gözləmək olar. “Qarabağ” ilk oyunda pis təsir buraxmadı”.
Yazıçı Seyran Səxavət isə bütün qəlbi ilə “Qarabağ”ın qələbəsini gözləyəcəyini bildirib. Onu fikrincə, “Qarabağ” mərhələ keçməsə də, minimal hesabla qələbəsinə çox sevinəcək. ““Qarabağın” qələbəsini istəyərdim. Heç olmasa minimal hesabla qalib gəlsin. Mərhələ keçməsə də olar. Son “Qəbələ” ilə oyunlarını izləmişəm. Əfran İsmayılov, Rauf Əliyev çox yaxşı oyunçulardı. Onlara çox ümidliyəm. Qarabağa uğurlar arzulayıram”.
“525-ci” qəzetin redaktor müavini Yusif Rzayev də oyundan ümidli olduğunu bildirib. “Birinci oyunda Bakıda uduzsa da, nəsə məndə bir inam var ki, "Qarabağ" cavab görüşündə, səfərdə oynasa da, daha yaxşı oyun göstərəcək. Hətta, "Qarabağ"ın növbəti mərhələyə keçəcəyinə də böyük ümidim var. Amma keçməsə belə, ötən oyunlara görə, son illər bizə, bütün Azərbaycana yaşatdıqları bir çox qələbələrə görə "Qarabağ" komandasına, komandanın baş məşqçisi Qurban Qurbanova, bütün oyunçulara sonsuz təşəkkürlər düşür”.
Abbas QƏMLİ
