Bu gün Azərbaycan Mərkəzi Kooperativlər İttifaqının (“Azərittifaq”ın) 22-ci qurultayı keçirilib. Modern.az xəbər verir ki, 22-ci qurultay öncəsi iştirakçılar Fəxri Xiyabanda Heydər Əliyevin məzarını, Şəhidlər Xiyabanını ziyarət ediblər.
Tədbirdə məruzə ilə çıxış edən “Azərittifaq” İdarə Heyətinin sədri, deputat Eldar Quliyev prezident seçkilərində İlham Əliyevin namizədliyinin dəstəklənməsi barədə təklif irəli sürdü. “YAP-ın 5-ci qurultayında elan olunan qərar yalnız altı yüz min nəfərdən artıq üzvü olan Yeni Azərbaycan Partiyasının deyil, Azərbaycan xalqının böyük əksəriyyətinin fikridir”, – deyə E. Quliyev vurğulayıb. Tədbirdə prezidentin qurultay iştirakçılarına ünvanladığı məktub dinlənilib.Gündəliyə daxil olan - Azərbaycan Respublikasının Prezidenti cənab İlham Əliyevə müraciət qəbul edilməsi; Azərittifaqın Təftiş komissiyasının hesabatı; Azərbaycan Mərkəzi Kooperativlər İttifaqının keçən dövr ərzində Azərittifaqın Şurası və İdarə Heyətinin işi barədə hesabat və kooperasiyanın qarşısında duran vəzifələr; Azərittifaq Şurasının Prezidentinin-Azərittifaqın İdarə Heyəti sədrinin seçilməsi; Azərittifaq Şurasının yeni tərkibinin seçilməsi;Azərittifaqın Təftiş komissiyasının yeni tərkibinin seçilməsi kimi məsələlər yekdilliklə qəbul edilib.
Daha sonra Azərbaycan Mərkəzi Kooperativlər İttifaqının hesabatı və “Azərittifaq” qarşısında duran vəzifələrdən danışılıb.
Sonda Eldar Quliyev növbəti 5 il üçün “Azərittifaq”ın sədri seçilib.
Namidə BİNGÖL
Foto: Elçin MURAD
