Bakının Hökməli kəndi və ona yaxın Qobu, Güzdək kimi ərazilərin sakinləri uzun illərdir ki, içməli suya həsrət qalıblar. Hətta kənd sakinləri su maşınlarını səsindən tanıyırlar. Səhərlər su maşınlarının səsinə oyanan sakinlər sürücüyə acıqlanmır, tələm-tələsik vedrələri əllərinə götürürlər. Axı gələn su maşınıdır...
İllərdir ki, içməli suyu pulla alan sakinlər hər ayın sonunda məvacibinin müəyyən qədərini məhz su almaq üçün kənara qoymalı olur. Susuzluqdan “dilləri quruyan” Hökməli kəndinin sakinləri hər dəfə bir maşın suya 20 manat verməklə boğazlarını yaşlayırlar. Vay o gündən ki, suyun qurtardığı vaxt pul da olmaya. Əlacsız qalan Hökməli sakinləri əllərində su qabları qohum-əqrəba qapılarına üz tuturlar.
“Azərsu” ASC-nin mətbuat xidmətinin rəhbəri Anar Cəbrayıllı deyir ki, yaxın illərdə Bakı kəndlərinin hamısı içməli su ilə təchiz olunacaq.
“Bakının Digah, Məhəmmədi, Balaxanı, Qala kəndlərinə su verilməyə başlayıb. Dediyiniz ərazilər 2014-cü ildə içməli su ilə təchiz olunacaq. Bundan başqa, Mərdəkan, Şüvəlan, Zirə, Qala, Dübəndi, Şağan, Maştağa kəndinin bir hissəsi, Pirallahı rayonu da içməli suyu maşınla alır. “Azərsu” çalışır ki, 2014-cü ilə kimi Bakının bütün içməli su problemini həll etsin”, – deyə Anar Cəbrayıllı bildirdi.
Gültəkin ƏLƏSGƏR
