Tələbə Qəbulu üzrə Dövlət Komissiyası 2013/2014-cü tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədilə rezidentura səviyyəsinə qəbul imtahanı keçirir.
İmtahanda iştirak etmək üçün ərizə qəbulu internet vasitəsilə 2013-cü il avqustun 18-dən 23-dək aparılmış və 1297 nəfər elektron ərizə doldurub təsdiq etdirmişdir. Onlardan 942 nəfəri qız, 355 nəfəri isə oğlanlardır.
İmtahan Bakı şəhərində 2 binada Azərbaycan Tibb Universitetinin I və V tədris binalarında, eləcə də Naxçıvan şəhərində 1 binada keçiriləcəkdir. Bakı şəhərində 1281 namizədin, Naxçıvan şəhərində isə 16 namizədin imtahan verəcəyi nəzərdə tutulur. İmtahanların idarə olunması üçün 22 imtahan rəhbəri, 143 zal nəzarətçisi ayrılıb.
Qəbul imtahanları test üsulu ilə iki mərhələdə keçirilir.
Birinci mərhələdə namizədlərin baza ali tibb təhsili istiqamətinə müvafiq olan qəbul proqramı əsasında baza fənləri üzrə bilikləri, ikinci mərhələdə isə ixtisas fənləri üzrə bilikləri yoxlanılacaq.
Birinci mərhələnin imtahanı 09.09.2013-cü ildə, ikinci mərhələnin imtahanı 10.09.2013-cü ildə keçiriləcək.
Namizədlər sentyabrın 3-dən etibarən öz elektron ərizələrinə daxil olaraq, hər bir imtahan üçün ayrılıqda "Namizədin imtahana buraxılış vərəqəsi"ni çap etməlidirlər.
İmtahanda iştirak etmək üçün namizədlər aşağıdakı sənədləri mütləq təqdim etməlidirlər:
-"Namizədin imtahana buraxılış vərəqəsi"ni- şəxsiyyəti təsdiq edən sənədin əslini
Göstərilən sənədlərdən biri olmadıqda və ya sənədlər arasında uyğunsuzluq olduqda namizəd imtahana buraxılmayacaq.
Namizədlərə baza və ixtisas fənlərinin hər birindən ayrılıqda 100 test tapşırığı təqdim olunacaq.
Hər iki mərhələdə namizədin hər bir test tapşırığına düzgün cavabı 1 (bir) balla qiymətləndirilir, səhv cavablar namizədin imtahan nəticəsinə təsir göstərmir.
İmtahan suallarının cavablandırılmasına hər bir mərhələ üzrə 2 saat 30 dəqiqə vaxt ayrılır.
Müsabiqə baza və ixtisas fənlərindən toplanılan balların cəminə əsasən aparılır. Müsabiqədə iştirak etmək üçün namizədin baza fənləri üzrə imtahanda topladığı test balı 40-dan, ixtisas fənləri üzrə imtahanda topladığı test balı isə 50-dən az olmamalıdır.
Rezidenturaya qəbul olunmaq üçün ixtisas seçimi qəbul imtahanının nəticələri elan olunduqdan sonra aparılacaq. Namizədlər müəyyən olunmuş müddət ərzində elektron ərizələrinə daxil olaraq ali tibb təhsili bazasına uyğun (bitirdiyi fakültəyə müvafiq olan) ixtisasları seçib təsdiq etməlidirlər.
Qeyd edək ki, rezidenturada qəbul aparılacaq plan yerlərinin sayı 528-dir.
Modern.az
