Bu gün MSK-nın namizədlərin imzatoplama kampaniyası üçün müəyyən etdiyi sonuncu gündür. Lakin bəzi namizədlər hələ də MSK-ya imzaları təqdim etməyiblər.
Modern.az bununla bağlı prezidentliyə namizədlər arasında sorğu keçirib.
Azərbaycan Demokrat Partiyasının sədri Sərdar Cəlaloğlu günün ikinci yarısına imzaları MSK-ya təqdim edəcəyini bildirib. “İmzatoplama kampaniyası dünən saat 4-də başa çatıb. 42500 imza xeyrimə toplanıb. Hazırda təlimata uğun sənədlərimin hazırlanması prosesi gedir. Günün ikinci yarısına imzaları təqdim edəcəyik”.
“A 13” hərəkatından prezidentliyə namizəd Ərəstun Oruclu isə günün sonuna qədər sənədləri MSK-ya təqdim etməyə çalışacaqlarını bildirib. “Hələ ki, bir şey deyə bilməyəcəyəm. Çalışırıq ki, saat 4-ə qədər əllərdə olan imza vərəqələrini toplayaq. O vaxta qədər sənədləri hazırlayırıq. Ümid edirəm ki, hər şey yaxşı olacaq”.
Bütöv Azərbaycan Xalq Cəbhəsi Partiyasının sədr müavini Niyaməddin Orduxanlı isə bildirib ki, partiya sədri Qüdrət Həsənquliyevin xeyrinə toplanan 44150 imzanın sentyabrın 6-da MSK-ya təqdim edilib.
Azərbaycan Liberal-Demokrat Partiyasının mətbuat xidməti imzaların MSK-ya sentyabrın 6-da təqdim olunduğunu bildirib.
Azərbaycan Sosial-Demokrat Partiyasının sədri Araz Əlizadə isə namizədliyi üçün toplanan səsləri sentyabrın 7-də MSK-ya təqdim etdiyini bildirib.
Ədalət Partiyasının sədri İlyas İsmayılov da MSK-ya imzaları təqdim etdiyini deyib.
Azadlıq Partiyasının sədri Əhməd Oruc MSK-ya sentyabrın 8-i sənədlərini təqdim etdiyini bildirib. “Dünən saat 2-də xeyrimə toplanan imzalar MSK-ya təqdim olunub”.
Vüqar İsmayılov
