ABŞ dövlət katibinin köməkçisinin demokratiya və insan hüquqları üzrə müavini Tomas Melianın ölkəmizə səfərinin təxirə salınma səbəbinə aydınlıq gətirilib. ABŞ-ın Azərbaycandakı səfirliyinin mətbuat xidmətindən Modern.az-ın sorğusuna cavab olaraq bildirilib ki, səfər Azərbaycan hökumətinin istəyi ilə təxirə salınıb.
“Azərbaycan hökuməti oktyabrın 9-u prezident seçkisinə qədər bu səfərin təxirə salınmasını istəyib. Biz təəssüf edirik ki, seçkiöncəsi vəziyyətlə tanış olmaq üçün nümayəndə heyəti Azərbaycana səfər edə bilməyib. ABŞ səfirliyi Azərbaycanda seçkiqabağı vəziyyəti yaxından müşahidə etməkdə davam edir və insanların iradəsini əks etdirən azad, ədalətli seçki prosesi keçirməyə çağırır”, – deyə ABŞ-ın Azərbaycandakı səfirliyinin mətbuat xidmətindən bildirilib.
Qeyd edək ki, Azərbaycanla bağlı verdiyi açıqlamaları ilə böyük rezonans doğuran Tomas Melia sonuncu dəfə ölkəmizdə aprelin 17-də səfərdə olub. Melia sonuncu səfər çərçivəsində prezident İlham Əliyev, xarici işlər naziri Elmar Məmmədyarov və ATƏT ölkələrinin Azərbaycandakı təmsilçiləri ilə görüşüb.
Gültəkin ƏLƏSGƏR
