“Minsk Qrupu həmsədrlərinin tez-tez dəyişilməsinin Qarabağ probleminin həllinə heç bir təsiri yoxdur”. Bunu Modern.az-a Atlas Araşdırmalar Mərkəzinin rəhbəri, politoloq Elxan Şahinoğlu deyib.
Qeyd edək ki, Minsk Qrupunun üç həmsədrindən biri olan ABŞ Yan Kellini Ceyms Uorliklə əvəz edib və artıq o, Azərbaycana səfər edib. Elxan Şahinoğlu qeyd edib ki, son 15 ildə Minsk Qrupunda 20-dən çox həmsədr dəyişilib. Onlardan fəal olanlarının aktivliyi də heç bir müsbət nəticə verməyib.“Metyu Brayza bölgəni ən yaxşı tanıyan həmsədrlərdən biri idi”, – deyən E. Şahinoğlunun sözlərinə görə, həmsədrlərin peşəkarlıq meyarları Qarabağ məsələsinin həllinə təsir etmir. “Əsas həmsədr dövlətlərin ortaya qoyduğu siyasətdir. Əgər Vaşinqton, Paris və Moskva münaqişənin qısa zamanda ədalətli həllini istəsə, problem müsbət nəticələnər. Bu mənada Minsk Qrupuna həmsədr təyin olunan şəxslərin heç bir hüququ yoxdur”.
Aqşin Kərimov
