“Məşvərət Məclisini heç bir normaya sığmayan şəkildə tərk eləmiş və Rusiyanın " Milli Şura" proyektinə qoşulan KXCP, ACP, ALP, AMİP yazıq bir duruma düşüblər. Hesab edirəm ki, onların bu duruma düşməsi mənə qarşı elədikləri xəyanətin nəticəsidir və onlar bundan sonra daha çətin vəziyyətdə düşəcəklər və buna layiqdirlər”. Modern.az-ın məlumatına görə, bu fikirləri prezidentliyə namizəd, Azadlıq partiyasının sədri Əhməd Oruc bildirib.
Ə.Oruc daha sonra Lalə Şövkətlə İsa Qəmbər arasında yaşanan qalmaqala münasibət bildirib:
“Məni Müsavat Partiyası ilə Liberal Partiyası arasındakı uçuz söyüşmə şousunda liberalların tərəfdarı kimi təqdim ediblər. Hamı bilir ki, mənim Liberal partiyası ilə heç bir münasibətim yoxdu və xanımlar haqqında danışmıram . Amma sədri olduğum Azadlıq partiyası uzun müddət Musavat partiyası ilə müttəfiq olub, 2003-də İsa Qəmbəri dəstəkləyib. Həmin il İsa bəyə görə yalnız Şabranda 23 üzvümüz həbs olunmuşdu, müavinim Kamran Məhərrəmlinin qardaşlarına olmazın işgəncələr verilmişdi.... Bu gün müsavatçılar hər yerdə əleyhimə təbliğat aparır, İsa bəy 5-10 manat pul vəd edən istənilən buqələmunu dəstəkləyir, onu müxalifətin "vahid namizədi" kimi təqdim edir, bizim partiyaya azsaylı deyə rişxənd edirlər.... Bu adamların lüğətində vəfa, sədaqət, mənəvi borc kimi sözlər artıq yoxdur.
Mən adamları heç vaxt aldatmamışam. Öz övladımı xaricdə oxudub, xalqın övladlarının aldadılaraq institutdan qovulması, həyatlarının məhv edilməsi, ailələrinin dağılması ilə nəticələnən işlərə təhrik edənlərdən olmamışam”-deyə partiya sədri şikayət edib.
Anar RÜSTƏMOV
