AXCP sədri Əli Kərimli Milli Şuranın prezidentliyə namizədi Cəmil Həsənliyə kömək üçün çağırış edib. Modern.az-ın məlumatına görə, Əli Kərimli Cəmil Həsənlinin təşviqatı üçün könüllülərə ehtiyac olduğunu deyib:
“Çox işləməliyik. O qədər çox ki, bütün bu inzibati yollarla və saxtakarlıqla toplanılacaq səsləri kompensasiya edə bilək. Hamılıqla çalışmalıyıq. O qədər çox olmalıyıq ki, kampaniya dövründə 100 minlərlə ailənin qapısını döyə bilək, Cəmil müəllimin təşviqat materiallarını milyonlarla insana çatdıraq. 5000-dən artıq seçki məntəqəsinin hər birində bir neçə nəfərlə təmsil olunaq. Daha azad, daha ədalətli Azərbaycan arzulayan hər bir şəxs bu kampaniyaya könüllü olaraq qoşulmalıdır. Hamıya iş çatacaq”.
AXCP sədri həmçinin Cəmil Həsənlinin seçki kampaniyasına qoşulmayan bəzi Milli Şura üzvlərinə, siyasi partiyaları qınayıb.
“Birləşmiş müxalifətin vahid namizədi Cəmil Həsənli üçün imzaların qısa zamanda, asanlıqla toplanması, cəmiyyətin bütövlükdə Cəmil müəllimə müsbət münasibəti bəzi insanları arxayınlaşdırıb. Ölkədə köklü dəyişiklik istəyən xeyli sayda insan “müxalifət partiyalarında adam çoxdur, mənsiz də keçinərlər” düşüncəsi ilə Cəmil müəllimin seçki kampaniyasına hələ də qoşulmayıb. Amma təəssüf ki, bizdə demokratik seçkilərə indi heç bir zəmin yoxdur”.
Anar RÜSTƏMOV
