Mərkəzi Seçki Komissiyasının (MSK) prezidentliyə namizədliyi irəli sürülmüş şəxslərə imza vərəqlərini təqdim etməsi üçün verdiyi vaxt ötən gün saat 18:00-da başa çatıb. Prezidentliyə namizədliyi irəli sürülən 22 nəfər olsa da, onlardan bir neçəsi imza vərəqlərini təqdim edə bilmədiyi üçün prosesdən kənarda qalıb.
MSK-nın mətbuat xidmətinin rəhbəri Azər Sarıyev Modern.az-a açıqlamasında bildirib ki, namizədliyi təsdiq olan şəxslərdən 7-si imza vərəqlərini komissiyaya təqdim etməyiblər.
“Prezidentliyə namizədlik üçün 22 nəfər müraciət etmişdi. Mərkəzi Seçki Komissiyası (MSK) tərəfindən onlardan 21-nin namizədliyinin irəli sürüldüyü təsdiq olundu. İbrahimbəyov Rüstəm Məmmədibrahimoviçin namizədliyinin təsdiq olunmasından imtina edilib. İkili vətəndaşlığı və digər dövlətlər qarşısında öhdəliyi olduğu üçün onun namizədliyinin qeydə alınmasından imtina edilib. 21 nəfərdən yalnız 14 nəfəri dünən saat 18:00-dək imza vərəqlərini Mərkəzi Seçki Komissiyasına təqdim ediblər. 14 nəfərdən 3-nün namizədliyi qeydə alınıb. Əliyev İlham Heydər oğlunun, Ağazadə İqbal Feyruz oğlunun və Oruc Zahid Məhərrəm oğlunun namizədliyi Mərkəzi Seçki Komissiyasında qeydə alınıb”-deyə MSK rəsmisi bildirib.
Qeyd edək A.Sarıyev MSK-nın sabahki iclasında digər namizədlərin qeydə alınması məsələsinə baxılacağını bildirib:
“Sabah komissiyanın iclası gözlənilir ki, yəqin ki, sənədləri təqdim edilən şəxslərin bəzilərinin qeydə alınma məsələsinə baxılacaq”.
A.Sarıyevin sözlərinə görə, 7 nəfər imza vərəqlərini təqdim edə bilməyiblər. Bunlar Məmmədov İlqar Əli oğlu (İlqar Altay), Oruclu Ərəstun Məmməd oğlu, Yusifov İsmayıl Sədulla oğlu, Həsənov Elşən Şirzad oğlu, İsaqov Qüdrət İsaq oğlu, Quliyev Rauf Zakid oğlu, Rüstəmbəyli Hidayət Əşrəf oğlu imza vərəqlərini və digər sənədləri MSK-ya təqdim etməyiblər. ”Bu şəxslərdən İlqar Məmmədov və Qüdrət İsaqov Mərkəzi Seçki Komissiyasına müraciət edərək seçkiyə namizəd kimi qatılmaq istəmədiklərini bildirdilər”.
MSK rəsmisi həmçinin vurğulayıb ki, seçki təşviqatına sentyabrın 16-dan başlanaraq oktyabrın 8-dək davam etdiriləcək.
“Seçki təşviqatı sentyabrın 16-dan başlayır. Təşviqat səsvermə gününə 23 gün qalmış başlayır, səsverməyə 24 saat qalmış isə dayandırılır”.
Anar RÜSTƏMOV
