“20 ildən artıq vaxt keçdiyini nəzərə alaraq deyə bilərəm ki, əzab-əziyyətə və nifrətə son qoymağın vaxtı gəlib çatıb”. Modern.az xəbər verir ki, bu sözləri ATƏT-in Minsk Qrupunun yeni təyin olunmuş amerikalı həmsədri Ceyms Uorlik jurnalistlərə açıqlamasında deyib. Onun sözlərinə görə, bu, onun Azərbaycana ilk səfəridir:
“Yenidən bura səfərlərimin olacağını səbirsizliklə gözləyirəm. Bu səfərlərin məqsədi və qayəsi Dağlıq Qarabağ münaqişəsinin tərəflərinə və münaqişənin sülh yolu ilə həll edilməsində köməklik göstərməkdir. Münaqişənin Helsinki Yekun Aktına əsasən birdəfəlik həll edilməsi üçün tərəflərin birgə işləməsi vaxtı gəlib çatıb. Minsk Qrupu həmsədrləri, həmçinin Azərbaycan və Ermənistan hökumətləri, eləcə də regiondakı digər ölkələrin birgə səylər və zəruri addımlar ataraq bölgənin gələcəkdə çiçəklənməsi, sülhə qovuşması və inkişaf etməsi vacibdir”.
Yeni həmsədr bildirib ki, sülhə nail olmaq üçün xalqlar güzəştə getməyi bacarmalıdır: “Davamlı sülhə nail olmaq üçün hər iki tərəf rəhbərlərinin siyasi iradə göstərməsi, eləcə də hər iki tərəf xalqlarının güzəştlərə getməsi üçün cəsarətli addımlar atması tələb olunur. Münaqişənin davamlı sülhlə yekunlaşması üçün Minsk Qrupundan olan həmsədr həmkarlarımla birgə fəaliyyət göstərəcəyəm. Atəşkəs müqaviləsi imzalanmasının 20 illiyinin yaxınlaşdığı bir ərəfədə davamlı sülh yollarını birgə axtarıb tapmaq lazımdır”.
Ceyms Uorlik regiona səfər çərçivəsində Dağlıq Qarabağa da səfər edəcəyini qeyd edib: “Bu mənim regiona ilk səfərimdir. Bu səfər çərçivəsində Dağlıq Qarabağa da səfər edəcəyəm. Ümumilikdə səfər ərzində məqsədim bir qədər çox fikirləri və rəyləri öyrənmək, mümkün qədər çox məlumat əldə etməkdir. Yaxın gələcəkdə yenidən Azərbaycana səfər etməyi səbirsizliklə gözləyirəm”
Gültəkin Ələsgər
