Modern.az xəbər verir ki, Bakı Şəhəri üzrə Təhsil idarəsinin müdir əvəzi Məhəmməd Bayramov təhsil ocaqlarındakı korrupsiya hallarından danışıb. “29 nömrəli Uşaq Yaradıcılıq Mərkəzinin direktorunun işçilərinin plastik kartları vasitəsilə bankomatdan külli miqdarda dövlət vəsaiti mənimsəməsi və yol verdiyi digər nöqsanlar araşdırılıb və Xəzər Rayon Prokurorluğu tərəfindən tədbir görülüb”.
M.Bayramov eyni zamanda uşaq evləri və bağçaların metodik vəsaitlərlə təmin edilməsi məsələinə də toxunub.
“Məlumdur ki, Azərbaycan Respublikası Prezidentinin 27.12.2011-ci il tarixli Sərəncamı ilə körpələr evləri, uşaq bağçaları və uşaq evi yerli icra hakimiyyəti orqanlarının tabeliyinə verilib, amma onlara elmi-metodiki təminat Təhsil Nazirliyi və tabeliyindəki təhsil qurumları tərəfindən həyata keçirilir. Lakin indiyədək heç bir mexanizm olmadığından bu sahəyə müvafiq metodiki xidmət göstərilməyib. Orta təhsil sahəsində həyata keçirilən yeniliklər şəhər üzrə təhsil müəssisələrinə göstərilən metodik xidmət işinin məzmun və mahiyyətinin təkmilləşdirilməsinə təlabat yaradıb. Ona görə də təhsil müəssisələrinə göstərilən metodik xidmət işini daha da yaxşılaşdırmaq məqsədilə Bakı Şəhəri üzrə Təhsil İdarəsi Metodik Mərkəzin strukturunda dəyişikliyinin edilməsini məqsədəuyğun hesab edir. Bununla bağlı Təhsil Nazirliyinə təklif verilib”.
BŞTİ-nin rəsmisi qeyd edib ki, tədris ilinin əvvəlində 46 məktəbdənkənar təhsil müəssisəsində 3187 dərnək və bölmədə 40196 uşaq məşğul olduğu halda, ilin sonunda bu rəqəm müvafiq olaraq 3142 qrup 39836 uşaq olub.
“Məktəbdənkənar təhsil müəssisələrində isə davamiyyət zəif olduğu üçün 2013 - cü ilin aprel ayından 24 qrupun fəaliyyəti müvəqqəti dayandırılıb”.
Aytən ƏLİYEVA
