Əziz həmvətənlər!
Namizədliyimizin rəsmən qeydə alınması ilə ölkəmizin həyatında və gələcəyində daha üstün keyfiyyətdə iştirak imkanımız yaranmış oldu.Bu haqqı bizə tanıyan və imzası ilə baxışlarımızın,qabaqcıl ideyalarımızın xalqa yüksək tribunalardan çatması üçün dəstək olan bacı və qardaşlarımıza,
ağsaqqal və ağbirçəklərimizə dərin təşəkkürlərimizi bildiririk.
Azərbaycan min illərdir ki,onu sevərək quranların çiynində yaşamaqda davam edir.Dövlətimizin varlığına olan təhlükələr artıq arxada qalıb.İndi sabahın çağırışlarına hazır olmaq gərəkdir.Buna ümidi böyük olanların səfərbərliyini gücləndirərək,inamsızları nikbin bir həyata qaytararaq yolumuza davam etməliyik.
Mən,Zahid Oruc,1972-ci ildə anadan olmuşam.Hər iki valideynim qədim oğuz yurdu Ermənistandan deportasiya olunaraq 1949-cu ildə Gədəbəy rayonuna pənah gətiriblər.Atamızı-sadə bir zəhmət adamını erkən yaşlarında itirmişik.Dəyanəti,dözümü və alın təri ilə bizi qoruyan Anamızın işığında 4 övlad olaraq böyümüş,halal həyat dərsi almışıq.
Orta məktəbi əla qiymətlərlə bitirdikdən sonra yüksək balla Azərbaycan Texniki Universitetinə qəbul olunmuşam.Sovetlərin çöküşünü yaşadığmız o illər bütün xalqımız kimi biz tələbələrin də taleyində dərin izlər buraxıb.Meydan hərəkatı və milli oyanış proseslərində hər bir kütləvi aksiyaya yaxından dəstək verən gənclərin fəal təmsilçisi kimi hər zaman ayaqda olmuşuq.
Ali təhsil dövrümüzün düşdüyü demokratikləşmə ab-havası fonunda oxuduğum təhsil ocağında yüksək qiymət sahiblərini Universitetin Elmi Şurasına üzv seçiblər.Mən 12 fakültədən birinin təmsilçisi kimi 5 il ərzində həmin Şuranın üzvü olmuş,həmkarlarımın maraqlarını müdafiə etmişəm.
Təhsilin sonrakı pilləsində aspirantura və elmi işlərim başlayıb.Paralel şəkildə siyasi proseslərə fəal qatılmaq üçün Ana Vətən Partiyasına gəlmiş,həmin təşkilatın quruculuğunda kiçik bir zəhmətə qatlaşmağa çalışmışam.O üzdən keçmiş həmkarlarımın hər birinə və partiyanın rəhbərliyinə təşəkkürlərimi bildirirəm.
Yaşıımın 21-ci əsrə düşən hissəsi Parlament üzvü olaraq ölkəmizin quruculuğuna və ictimai-siyasi həyata bağlılıqda keçib13 il ərzində Milli Məclisin fəaliyyətini qiymətləndirən müxtəlif ictimai təşkilatlar tərəfindən “ilin 10 fəal millət vəkili” kimi mükafatlara layiq görülmüşəm.Belə mənəvi qiymətləndirmələr bizə böyük Atatürkün “qulluqların ən şərəflisi xalqa xidmətdir” idayası ilə daha yaxşı çalışmağa ruh verib.Təmsilçisi olduğum rayonun onlarla probleminə qatlaşaraq bu imam torpağının insanları ilə birgə quruculuğa,bərpa və yenidənqurmaya bir misqal əmək qatmışıq.
Siyasi idealım böyük dövlət adamı Heydər Əliyevdir.Bu gün Prezidentliyi uğrunda müxtəlif ideologiyaların və cərəyanların savaşdığı bir məmləkətin qurucusu olan bir şəxsiyyətin timsalında Bismarkı,yaxud Corc Vaşinqtonu gördüyümüzü hər zaman fəxarətlə söylədik və bundan qürur duyduq.Bizim anlamda Heydər Əliyevin məktəbini keçmədən hakimiyyətə gəlmək mümkün deyil!Bütün siyasi qüvvələr ona söykənsəydilər,daha güclü olardılar.İngilis,alman və yəhudi millətinin nümayəndələrinin gəlib baş əydiyi bir sima bu millətin başıını uca edən dövlət simvoludur!
Şəxsi həyat tariximi davam etdirərək deməyi özümə borc bilirəm ki,əmlak durumum haqda ətraflı məlumatı ictimaiyyətə təqdim etmişəm.Yaşadığm ev,bağ sahəsi və nəqliyyat vasitəsi haqda informasiyalar orada özünə yer tapıb.
Ailə həyatım tələbəliyimin bir parçasıdır.Evimizdə iki övlad-Elton və Eltac adlı çalışqan,valideyn kölgəsi ilə zədələnməyən iki Azərbaycan türkü böyüyür.Qızım 12 yaşının yol verdiyi fəhm və duyumla hər bir siyasi addımıma nəzər yetirən yaxşı izləyicilərdən biridir.
Bu məsuliyyətli və şərəfli anda biz Azərbaycanı hər bir insanımızın uğur qazandığı və “vətəndaşı güclüdürsə,Vətən güclüdür” məfkurəsinin hakim kəsildiyi bir diyar kimi görürük!
Tanrı millətimizi və sizləri qorusun!
Zahid Oruc
