“Rüstəm İbrahimbəyov bir daha öz qeyri-ciddiliyini ortaya qoydu” Bunu Gün.Az-a açıqlamasında Yeni Azərbaycan Partiyası (YAP) İdarə Heyətinin üzvü, millət vəkili Eldar İbrahimov Milli Şuranın sədri və keçmiş prezidentliyə namizədi Rüstəm İbrahimbəyovun Mərkəzi Seçki Komissiyası (MSK) tərəfindən namizədliyinin təsdiqindən imtina edilməsi ilə əlaqədar sözügedən şəxsin BMT-nin İnsan Hüquqları Komitəsinə şikayət etməyə hazırlaşması haqda fikirlərinə münasibətini bildirərkən dilə gətirib.
Millət vəkilinin dediyinə görə, həmin şəxs son fikirləri ilə həm qanunlardan, həm də siyasətdən bixəbər olduğunu yenidən çılpaq şəkildə nümayiş etdirmiş oldu.
“Odur ki, cənab İbrahimbəyovun indi belə bir məsələ ilə bağlı harayasa, kiməsə müraciətinə, şikayətinə də heç bir əsas yoxdur” - deyən E.İbrahimov sonra bildirib ki, əslində həmin şəxs prezidentliyə namizədliyinin irəli sürüləcəyini və ikili vətəndaşlığının bu məsələyə problem yaradacağını bildiyi halda, həmin məsələni uzun müddət öz yaxın adamlarından, müttəfiqlərindən belə gizlədib, onları xəbərdar etməyi belə məqsədəuyğun saymayıb:
“Bu qədər də qeyri-ciddilikmi olar? Bunun özü suallar doğurmurmu? Niyə həmin suallara doğru-düzgün cavab vermir? Axı, bilirsən və ya bilirdin ki, ikili vətəndaşlıq problemin var, pasportun, sənədlərin qaydasında deyil, bunu vaxtında həll edəydin də?
Etməmisənsə, bu, artıq sənin və sənin namizədliyini irəli sürənlərin özlərinin günahıdır, bunun hakimiyyətə nə dəxli var? Bu məsələdə sənin və sənin namizədliyini irəli sürənlərin hakimiyyəti, MSK-nı ittiham etməsinə də heç bir əsas yoxdur və ola da bilməz.
Ümumiyyətlə, bu adamın məgər seçkilər start verilən ərəfədə yadına düşdü ki, sən demə ikili vətəndaş imiş və bu məsələni yoluna qoymaq lazımmış? Eyni zamanda, bu adam bilmirdimi ki, namizədliyi irəli sürülən şəxsin bütün sənədləri Azərbaycan qanunvericiliyi ilə yerli-yerində, qaydasında olmalıdır?
Həmçinin, bu adam məgər bilmirdimi ki, prezidentliyə namizədliyi irəli sürülən istənilən Azərbaycan vətəndaşı başqa ölkənin vətəndaşı və ya ikili vətəndaş ola bilməz?
Bu adam bu məsələni niyə məhz namizədliyi irəli sürüləndən sonra ortaya atdı, öz “müttəfiqlər”ini belə aldatmaq yolunu seçdi? Bu adam hələ də başa düşmürmü və bilmirmi ki, onun namizədliyini irəli sürənlər özləri onları pis vəziyyətə saldığı üçün məhz həmin imtinanı ediblər? Bilmirsə, çox pis, bilirsə, ondan da pis!
Yaxud da, namizədliyi hətta, təsdiqlənmiş olsaydı belə, guya ona imza verən olacaqdı? Kimdir onu tanıyan, axı? Ətrafındakılar belə ondan imtina etdilər...”
YAP funksionerinin bildirdiyinə görə, bu adam sadəcə, ilk gündən özünü biabır, ifşa etməklə məşğuldur:
“Belə adamdan da siyasətçi, prezidentliyə namizəd olar? Bu özü onu göstərir ki, müxalifət, onun namizədliyini vaxtı ilə müdafiə edənlər hansı acınacaqlı vəziyyətdədirlər. Onlara indi ölkənin taleyini etibarmı etmək olar? Qətiyyən!
Ona görə bir daha qeyd edirəm ki, Rüstəm İbrahimbəyovun nə fikirlərinin, nə də müraciətinin heç bir əsası yoxdur. Artıq Azərbaycan da 90-cı illərin əvvəllərinin Azərbaycanı deyil, onunla indi heç kim təzyiq-təhdid dilində danışa bilməz. BMT də yaxşı olardı ki, Ermənistanla bağlı qətnamələrinin icrasının həllinə nail olsun, Ermənistanı təcavüzkarlıq əməllərindən çəkindirsin.
19-20 il ərzində buna nail ola bilməyən bir təşkilatın müvafiq komitəsinin indi Azərbaycanla bağlı hansısa müraciətə, şikayətə baxması və ya qərar qəbul etməsi də heç cür müsbət qəbul oluna bilməz. İnanıram ki, belə bir şey də baş verməyəcək. Ona görə cənab İbrahimbəyov gedib öz işi ilə – kino çəkməklə məşğul olsa, daha yaxşıdır, siyasət onun kimilərin yeri deyil”.
Modern.az
