Ötən gün keçirilən buraxlış imtahanında şagirdlərin bəzi əşyaları imtahana buraxılmayıb. Bu əşyalar arasında oyuncaq, kosmetik vasitələr, ağardıcı qələm və sair olub.
Diqqətçəkən məqam odur ki, imtahana buraxılmayan vasitələr arasında dərmanlar da olub. Sosial mediada dərman vasitələrinin imtahana buraxılmaması narazılığa səbəb olub.
Maraqlıdır, Dövlət İmtahan Mərkəzi dərman vasitələrimin imtahana buraxılmasına niyə icazə vermir?
Məsələni öyrənmək üçün Modern.az Dövlət İmtahan Mərkəzinin mətbuat katibi Xanlar Xanlarzadə ilə əlaqə saxlayıb.
O, imtahana dərman vasitələrinin hansı hallarda buraxıla biləcəyini izah edib:
“İmtahana dərman vasitələrinin gətirilməsi və istifadə olunmasına yalnız xüsusi hallarda icazə verilə bilər. Bununla bağlı əvvəlcədən DİM-ə müraciət olunmalı və hər hansı bir xəstəliklə əlaqədar müvafiq sənədlər, eyni zamanda təcili istifadəsi zəruri olan dərmanların siyahısı təqdim olunmalıdır. Tibbi müdaxilə tələb edən digər hallarda imtahan binasının önündə daimi növbədə dayanan təcili yardım briqadalarının əməkdaşlarına müraciət olunur. Bu zaman həkimlər lazımi tibbi yardım göstərirlər”- mətbuat katibi qeyd edib.