Modern.az

Builki MİQ imtahanlarında keçid balı neçə olacaq? - Rəsmi CAVAB

Builki MİQ imtahanlarında keçid balı neçə olacaq? - Rəsmi CAVAB

Təhsil

16 May 2024, 12:34

Xəbər verdiyimiz kimi, mayın 15-dən etibarən 2024–2025-ci tədris ili üçün keçiriləcək dövlət ümumi təhsil müəssisələrinə müəllimlərin işə qəbulu üzrə (MİQ) müsabiqənin elektron sənəd qəbulu mərhələsinə start verilib. 
 
Müsabiqə üzrə qeydiyyat prosesi bir həftə - 22 may saat 11:00-dək davam edəcək.
 
Müsabiqə 4 mərhələdən ibarətdir: elektron ərizədəki göstəricilərin yoxlanılması, test imtahanı, vakant yerlərin seçilməsi və müsahibə.

Builki müsabiqənin test imtahanı mərhələsində keçid balı neçə olacaq?

Modern.az-ın məlumatına görə, Elm və Təhsil Nazirliyindən bildirilib ki, test imtahanının nəticələrində keçid balı 40 bal götürüləcək.

“Test imtahanında ümumtəhsil proqramı üzrə minimun 34 bal və tədris metodikası üzrə minimum 6 bal olmaqla, ümumi 40 bal və daha yüksək nəticə göstərən namizədlər vakant yerlərin seçiminə buraxılacaq”.

Test imtahanında hər bir namizədə onun ixtisası üzrə ümumi təhsil müəssisələrinin fənn proqramlarına aid 40 sual, tədris metodikası və təlim strategiyalarına aid 20 sual təqdim ediləcək.

Bu mərhələdə ixtisas üzrə düzgün cavablandırılan bir sual 2 bal, tədris metodikası və təlim strategiyaları üzrə isə 1 bal olaraq hesablanacaq.

Ümumilikdə cavablara 100 ballıq qiymətləndirmə sistemi tətbiq ediləcək.

Qaydalara əsasən, ixtisas üzrə 1 səhv cavablandırılmış sual -0,5 bal, tədris metodikası üzrə isə - 0,25 bal şəklində hesablanaraq namizədin imtahan nəticəsindən çıxılacaq.

A.Qorxmaz

Whatsapp
Bizə yazın!
Keçid et
Sərhəd pozuldu - Erməni sərhədçiləri Tavuşa yerləşdi