Azərbaycanın İnsan Hüquqları üzrə Müvəkkili Səbinə Əliyeva dövlət uşaq bağçalarında və körpələr evi-uşaq bağçalarında “uşaq psixoloqu” və “erkən inkişaf üzrə mütəxəssis” ştatlarının əlavə edilməsini təklif edib.

 

Modern.az-a danışan Elm və Təhsil Nazirliyi yanında İctimai Şuranın üzvü Rasif Dünyamalıyev bildirib ki, təklif yaxşıdır, amma burada müəyyən məqamlar var:

 

“Psixoloq ştatının əlavə edilməsindən əvvəl müəyyən olunmalıdır ki, psixoloq nə iş görəcək. Mənim fikrimcə burada psixoloq yox, uşaq inkişaf mütəxəssisləri yaxud sosial işçilərin olması daha məqsədəuyğundur. Çünki uşaqla psixoloji xidmət aparmaq üçün yetəri sayda peşəkar psixoloq yoxdur. Mövcud olan psixoloqlarımız nə dərəcədə peşəkardır ki, uşaqlarla psixoloji iş aparsınlar?! Burada psixoloq yerinə sosial işçilər yaxud uşaq inkişaf mütəxəssisləri yerləşdirilə bilər. Onlar isə mövcud olan problemli usağı psixoloji mərkəzə yönləndirə bilər. Bu prosesi mərkəzləşdirmək lazımdır".

 

R.Dünyamalıyevin sözlərinə görə, məktəblərdəki psixoloq ştatlarının gördüyü işlər göz önündədir:

 

“Bu kadrlardan demək olar ki, heç bir effekt almaq olmur. Çünki o psixoloqların nə dərəcədə keyfiyyətli olduğunu, təhsil səviyyəsini, bilik və bacarıqlarının nə dərəcədə olduğunu bilmirik. Ümumiyyətlə psixoloqun kompetensiya sənədi varmı? Yaxud belə deyək, məktəb psixoloqunun nə iş görməsi ilə bağlı əsasnamə varmı?Bildiyim qədərilə yoxdur. Əgər bu yoxdursa, biz eyni nəticəni məktəbəqədər təhsildə də alacağıq. Bu yanaşmanı dəyişməliyik. Dünya təcrübəsində görünən odur ki, psixoloji iş aparılmır. Orada bunu diaqnostika, ilkin dəyərləndirmə, diaqnostika edə biləcək mütəxəssislər olur, onlar testlərdən istifadə edərək ilkin probemi müəyyən edir və valideynə başa salırlar. Daha sonra valideynlər həmin işlə peşəkar məşğul olan mərkəzə yönləndirilir”.

 

Müsahibimiz sonda qeyd edib ki, bu istiqamətdə Elm və Təhsil Nazirliyinin hər rayon üzrə inkişaf mərkəzinin yaradılması daha məqsədəuyğundur:

 

“Məktəb və bağçalarda olan problemli uşaqlar həmin mərkəzə yönləndirilsin. Bu daha əlçatan və peşəkar addım olar. Çünki biz o qədər psixoloq tapa bilməyəcəyik. Ölkədə o sayda inkişaf etmiş, bilikli, bacarıqlı psixoloqumuz yoxdur. Bu gün ölkədə 1600 uşaq bağçası var, bəs o qədər peşəkar psixoloqumuz varmı?! Təklif yaxşıdır, sadəcə olaraq mexanizmin üzərində düşünmək lazımdır. Elə edilməlidir ki, problemdən çox onun həlli istiqamətində addım atılsın. Yoxsa sonra da müzakirə edəcəyik ki, bağçalardakı psixoloqlar işləyə bilmir”.