"2025-ci il dövlət büdcəsində elmə ayrılan xərclər 244,4 milyon manat nəzərdə tutulub. Bu məbləğ 2024-cü illə müqayisədə 3,5 faiz artıb, amma bu məbləğ dövlət büdcəsi xərclərinin heç 1 faizini təşkil etmir, hesab edirəm ki bu məbləğ azdır. Bu məbləğin neçə faizi elmlə məşğul olan alimlərə gəlib çatır?"
Modern.az xəbər verir ki, bunu Milli Məclisin deputatı Vasif Qafarov parlamentin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında gələn ilin büdcə zərfinin müzakirəsi zamanı deyib.
Deputat problemin həlli üçün iclasda iştirak edən elm və təhsil naziri Emin Əmrullayevə müraciət edib:
"Mən diqqəti elm sahəsində çalışan alimlərimizin aldığı əməkhaqqına yönəltmək istəyirəm. Hazırda Elmlər Akademiyasında çalışan alimlərimizin aldığı məvacib minimum əməkhaqqından bir qədər yüksəkdir. Elmlər Akademiyasında çalışan alimlərimizin tarif cədvəli üzrə maaşlarından vergilər çıxıldıqdan sonra kiçik elmi işçi 420 manat, elmi işçi 453 manat, böyük elmi işçi 489 manat, aparıcı elmi işçi 527 manat, baş elmi işçi və şöbə müdiri 576 manat məvacib alır.
Həmçinin, fəlsəfə doktoruna elmi rəhbərlik edən alimə verilən məvacib aylıq 23-24 manat civarındadır. Aylıq 23-24 manat maaşa alim yetişdirərlərmi? Bunun nəticəsidir ki, əksəriyyət etibarilə fəlsəfə doktorlarına elmi rəhbərliklər formal xarakter daşıyır.
Bundan başqa, son illərdə bir neçə dəfə ölkədə 10-20 faiz civarında maaşlar artırılıb. Bu artımlar Elmlər Akademiyasının Rəyasət Heyətinə şamil edilib, amma institutlara şamil edilməyib. Nəticədə Rəyasət Heyətində çalışan adi mütəxəssis institutlardakı elmlər doktoru, professor, şöbə müdirindən yuxarı maaş alır.
2025-ci il büdcə layihəsinə görə orta aylıq əməkhaqqının cari illə müqayisədə 90,1 manat artırılaraq 1080,1 manata çatdırılması proqnozlaşdırılır. Elmlər Akademiyasında çalışan alimlərimizin aldığı məvacib orta aylıq əməkhaqqından az qala 2 dəfə aşağı səviyyədədir. Hesab edirəm ki, elmə ayrılan vəsaitin həcminə baxılmalı və alimlərimizin əməkhaqları heç olmasa ölkə üzrə orta əməkhaqqı səviyyəsinə qaldırırılmalıdır.
Bununla yanaşı, fəlsəfə doktoru və elmlər doktoru elmi dərəcələrinə görə verilən müvafiq olaraq 60 və 100 manat məbləğ 2017-ci ildən sonra son 8 ildə artırılmamışdır. Bu məbləğin artırılması məsələsinə baxmaq lazımdır.
Bütün bu məsələləri nəzərə almağınızı xahiş edirəm."
