COP29 ilə əlaqədar Bakı və Sumqayıt şəhərlərində, Abşeron rayonunda peşə, orta ixtisas və ali təhsil pillələrində distant formada təhsilə keçid edilib. Bakıda keçirilən tədbir zamanı ali təhsil müəssisələrində dərslər distant keçirilib.
Bəs distant təhsil zamanı universitetlərdə tələbələrin davamiyyəti necə olub?
Modern.az mövzu ilə bağlı ali təhsil müəssisələri arasında sorğu keçirib.
Azərbaycan Texniki Universitetindən bildirilib ki, AZTU-da dərslər "Microsoft Teams" platforması üzərindən həyat keçirilib: “Hər hansı ciddi texniki problem olmayıb. Tələbələr normal qaydada onlayn dərslərdə iştirak edib”.
Azərbaycan Memarlıq və İnşaat Universitetindən verilən məlumata görə, 13-23 noyabr 2024-cü il tarixlərində Azərbaycan Memarlıq və İnşaat Universitetində (AzMİU) dərslər Zoom platforması vasitəsilə onlayn formada keçirilib: “Bu müddət ərzində tələbələrin davamiyyəti yüksək səviyyədə olub və dərslərə qoşulmaqda heç bir ciddi çətinlik yaşanmayıb. Universitetin texniki infrastrukturu və elektron sisteminin təkmilliyi sayəsində distant təhsil prosesi effektiv təşkil edilib".
Xəzər Universitetindən qeyd edilib ki, onlaynt dərslərdə davamiyyət 98-99 faiz olub: “Tələbələrin dərslərə qoşulmasında heç bir çətinliyi olmayıb”.
Azərbaycan Dillər Universitetindən qeyd edilib ki, ADU-da onlayn dərslər uğurla başa çatıb: “Hər hansı davamiyyət və texniki problem qeydə alınmayıb”.
Bakı Mühəndislik Universitetindən (BMU)bildirilib ki, öncədən bu prosesə hazırlığın yüksək səviyyədə təşkili, BMU-nun distant təhsil təcrübəsinə malik olması, üstəlik, "Google Classroom" ilə bağlı keçirilmiş təlimlərdə müəllimlərin artıq müəyyən təcrübə qazanması onlayn tədrisin uğurlu təşkilinə imkan verib: “Davamiyyət də aşağı səviyyədə olmayıb. Dərslərə qoşulmaqla bağlı problemlərə gəldikdə isə onlayn prosesdə xırda texniki nasazlıqlara rast gəlinməsi təbiidir. Amma ümumilikdə dərs prosesinə mənfi təsir edə biləcək texniki problem olmayıb”.
Azərbaycan Universitetindən bildirilib ki, Azərbaycanın COP29-a evsahibliyi etməsi ilə əlaqədar olaraq dərslər noyabrın 14-dən 23-dək “Microsoft Teams” platforması üzərindən, cari dərs qrafikinə uyğun olaraq eyni saatlarda təşkil olunub: “Bu müddət ərzində tləbələrin dərslərə davamiyyəti yüksək səviyyədə olub, qoşulma ilə bağlı isə demək olar ki, problem yaşanmayıb. Bir neçə xırda texniki problemə isə tez müdaxilə edilib”.
Azərbaycan Dövlət Pedaqoji Universitetindən bildirilib ki, COP29 müddətində Nazirlər Kabinetinin müvafiq qərarına əsasən Bakı, Sumqayıt şəhərləri və Abşeron rayonunda ali təhsil müəssisələrində tədrisin müvəqqəti olaraq məsafədən təşkil edildiyi dövr ərzində Azərbaycan Dövlət Pedaqoji Universitetində distant dərslərin təşkilində heç bir ciddi problem halı qeydə alınmayıb:
“Dərslərə qoşulmaqda çətinliklə bağlı universitet rəhbərliyinə cəmi bir müraciət daxil olub ki, bu problemin də həlli istiqamətində müvafiq addımlar atılıb. COP29 dövründə tələbələrin davamiyyəti ilə bağlı dəqiq statistik məlumatlar semestrin sonunda bəlli olacaq. Lakin distant təhsilə keçidlə bağlı qərarın imzalandığı gündən etibarən universitetdə bununla bağlı aparılan işlər - tələbələrin korparativ imeyl hesablarının sazlığının yoxlanılması, komandalara qoşulma və sistemin işləkliyinin qabaqcadan dəfələrlə test edilməsi, internetə çıxış imkanlarının araşdırılması, o cümlədən ölkə üzrə internetin əlçatanlığı və sürətinin standartlara cavab verməsi onu deməyə əsas verir ki, bu dövr ərzində tələbələrimizin dərsə davamiyyət faizi ilə əyani tədris dövrü ərzindəki davamiyyət göstəriciləri arasında ciddi fərq müşahidə edilməyib”.
