“Məktəbdə...” layihəsinin növbəti görüşü paytaxtdakı 49 nömrəli “İntellekt” məktəb-liseyində keçirilib. 

Modern.az xəbər verir ki, Bakı Şəhəri üzrə Təhsil İdarəsi tərəfindən reallaşdırılan layihənin budəfəki qonağı “Azərbaycan Televiziya və Radio Verilişləri” QSC-nin sədri Rövşən Məmmədov olub. 

Qonaq əvvəlcə məktəbin şəhid məzunlarının guşəsi önünə gül qoyub, məktəblə tanış olub.

Məktəbdə olmaqdan, şagirdlərin qarşısında çıxış etməkdən məmnun olduğunu bildirən qonaq məktəb illərindən, müəllimlərinin həyatında buraxdığı izlərdən, məktəbdə əldə etdiyi biliklərin həyatındakı önəmindən, peşə sahəsində uğur qazanmağın yollarından danışıb. Uğur qazanmaq üçün nəzəri biliklərlə yanaşı praktik bacarıqlara yiyələnməyin zəruriliyini vurğulayan R.Məmmədov həyat adlı müəllimdən də öyrənməyin üstünlüklərindən bəhs edib.

Müasir dünyada mətbuatın, xüsusilə elektron medianın rolundan danışan R.Məmmədov Azərbaycanın tarixinin, milli adət-ənənələrinin, elm və mədəniyyətinin təbliği istiqamətində telekanalların üzərinə düşən vəzifələrdən söz açıb. Qonaq, həmçinin ana dilimizin norma və tələblərinə əməl olunması, nitq mədəniyyətinin formalaşdırılması, səlis danışıq qaydaları barədə şagirdlərə tövsiyələrini verib. Güclü xarakterin formalaşmasında mənəvi-psixoloji amillərin önəmindən danışan AzTV sədri “Həyat mübarizləri sevir”, deyərək gəncləri idealları uğrunda mübarizə aparmağa çağırıb.  

Hər zaman ekranlardan izlədikləri aparıcını canlı olaraq öz aralarında görməkdən sevinc duyan şagirdlər qonağa çoxsaylı suallar ünvanlayıb, onları düşündürən mövzularla bağlı fikir mübadiləsi aparıblar.

Layihənin informasiya dəstəyi “Kaspi” qəzeti və Kaspi.az saytıdır.

Qeyd edək ki, "Məktəbdə...” layihəsinin əsas məqsədi şagirdlərə mənəvi-əxlaqi dəyərlərə hörmət və ictimai məsuliyyət hissi aşılamaq, mütaliəyə marağı artırmaq, vaxtın düzgün idarə olunması, mühitə adaptasiya yollarını təbliğ etməkdən ibarətdir.