Gəncə Dövlət Universitetinin Türkiyə Respublikasının İzmir Dokuz Eylül Universiteti ilə elmi əməkdaşlıq əlaqələri uğurla davam edir və daha da genişlənir.
Bildirək ki, GDU ilə Dokuz Eylül Universiteti arasında 2021-ci ildə imzalanan əməkdaşlıq müqaviləsinə əsasən ikili diplom proqramının icrası üçün ilkin anlaşma, eyni zamanda Avropa İttifaqının Erasmus+ KA107 və Mevlana proqramları çərçivəsində razılıq əldə olunub. Bununla yanaşı bu əlaqələr sayəsində Dokuz Eylül Universitetində dahi Azərbaycan şairi Nizami Gəncəvinin adına, Gəncə Dövlət Universitetində isə Türk dünyasının görkəmli şəxsiyyəti Yunus Əmrənin adına mühazirə otaqları yaradılıb. Hər iki universitet arasında imzalanmış müqaviləyə uyğun olaraq 2023/2024 tədris ilindən etibarən ikili diplom proqramı çərçivəsində Biologiya ixtisası üzrə mütəxəssis hazırlığına başlanılıb. Beynəlxalq akkreditasiyadan keçmiş Biologiya ixtisası üzrə tədris alacaq tələbələr ilk iki ili Dokuz Eylül Universitesində, növbəti iki ili isə Gəncə Dövlət Universitetində təhsil alacaqlar.
Dokuz Eylül Universiteti ilə elmi əməkdaşlığı daha da genişləndirmək məqsədilə Gəncə Dövlət Universitetinin rektoru Yusif Yusibovun rəhbərlik etdiyi nümayəndə heyəti hazırda Türkiyədə işgüzar səfərdədir.
Qardaş ölkəyə işgüzar səfəri çərçivəsində Gəncə Dövlət Universitetinin nümayəndə heyəti ikili diplom proqramı ilə əlaqədar Dokuz Eylül Universitetində keçirilən Senato toplantısında (Elmi Şura) iştirak edib. İclasda çıxış edənlər GDU ilə elmi əməkdaşlığı yüksək dəyərləndirib və nümanyəndə heyətini Dokuz Eylül Universitetində görməkdən məmnun olduqlarını dilə gətiriblər.
Gəncə Dövlət Universitetinin rektoru Yusif Yusibov Türkiyə ilə Azərbaycanın mehriban və qardaşlıq əlaqələrindən danışıb, xalqlarımızın bir-birinə bağlılığının çox qədim tarixə söykəndiyini qeyd edib. Dokuz Eylül Universiteti ilə həyata keçirilən ikili diplom proqramının önəmindən danışan rektor elmi əməkdaşlığın gələcəkdə daha da genişləndirilməsinə dəstək göstərəcəyini bildirib. GDU-da ikili diplom proqramı üzrə təhsil alan Türkiyəli tələbələrin yataqxana ilə təmin olunacağını söyləyib.
Görüşdə tələbə-müəllim mübadiləsi məsələləri müzakirə edilib, Tarix və İqtisadiyyat ixtisasları üzrə nəzərdə tutulmuş ikili diplom proqramının icrası üçün ilkin danışıqlar aparılıb və tərəflər arasında razılıq əldə olunub.
GDU-nun Ümumi İşlər üzrə prorektoru Samir Məmmədov, İnnovasiyalar Departamentinin direktoru Vasif Həsənov və Kimya-biologiya fakültəsinin dekanı İsfəndiyar Alverdiyev çıxış ediblər. Əməkdaşlıq çərçivəsində ötən tədris ilində akademik heyətin qarşılıqlı təcrübə mübadiləsinin və elmi tədqiqatların çox faydalı olduğunu diqqətə çatdırıblar.
Daha sonra Gəncə Dövlət Universiteti və İzmir Dokuz Eylül Universiteti arasında mövcud olan qarşılıqlı Anlaşma Memorandomu növbəti üç il müddətinə artırılmışdır.
Sənəddə ikili diplom çərçivəsində ali təhsil müəssisələri arasında əlaqələrin möhkəmləndirilməsi, birgə tədqiqatların aparılması, tələbə və müəllim mübadiləsi, birgə akademik konfransların keçirilməsi və bir sıra başqa istiqamətlər üzrə qarşılıqlı faydalı əməkdaşlığın həyata keçirilməsi nəzərdə tutulur.
Sonda qarşılıqlı hədiyyələr təqdim edilib.
