Sosial şəbəkələrdə müəllimlərin işə qəbulu (MİQ) və sertifikasiya imtahanlarının təşkilinin Dövlət İmtahan Mərkəzinı (DİM) verilməsilə bağlı təkliflər səsləndirilir.

Modern.az mövzu ilə bağlı Milli Məclisin Elm və təhsil komitəsinin üzvü Ceyhun Məmmədovla həmsöhbət olub.

Deputat bildirib ki, belə bir qərar hökumət strukturları tərəfindən verilir:

“Sözügedən məsələlər ölkə rəhbərliyinin və Nazirlər Kabinetinin qərarları ilə tənzimlənir. Biz nəzərə almalıyıq ki, proses çox mürəkkəbdir. Bunu həyata keçirmək o qədər də asan deyil. Yanaşmalarda müəyyən qədər həqiqət payı var. Nazirliyin də burada təbii ki, öz mövqeyi var. Elm və Təhsil Nazirliyi düşünür ki, onlar bu sahədə nəzarəti həyata keçirdikləri, mərkəzi icra hakimiyyəti olduqları üçün imtahanları özləri təşkil etməlidirlər”.

C.Məmmədov qeyd edib ki, bu gün ölkəmizdə vahid imtahan mərkəzi səmərəli fəaliyyət göstərir:

“Nəzərə alsaq ki, Dövlət İmtahan Mərkəzi fəaliyyət göstərir, gələcəkdə müəllimlərin işə qəbulu və sertifikasiya imtahanlarının bu mərkəz tərəfindən həyata keçirilməsi məsələsinə baxıla bilər. Çünki bu mərkəzin zəngin təcrübəsi, böyük imkanları var. Hazırkı dövrdə olmasa da, gələcəkdə prosesin vahid mərkəzdən idarə olunması üçün bu məsələyə baxmaq olar. Hazırda isə dövlətin qərarı ondan ibarətdir ki, bu imtahanlar Elm və Təhsil Nazirliyi tərəfindən həyata keçirilsin. Nəzərə almalıyıq ki, bu proses böyük vəsait, işçi kütləsi tələb edir. Gələcəkdə yeni islahatlar olarsa, düşünürəm ki, təklif nəzərdən keçirilə bilər”.