“Tədris etdiyi fənn üzrə sertifikasiya imtahanından keçə bilməyən müəllimə ikinci dəfə şans yaradılır və belə müəllimlər növbəti illərdə yenidən sertifikasiya imtahanında iştirak edir. Bu müddət ərzində onun dərs saatları azaldıla bilər”.

Bu barədə Modern.az-a açıqlamasında elm və təhsil eksperti Rizvan Fikrətoğlu deyib.

Onun sözlərinə görə, hər iki imtahandan uğur qazanmayanlar müəllimlikdən azad edilir:

“Nəzərə almaq lazımdır ki, müəllimlərin işə qəbul imtahanı ilə müqayisədə sertifikasiya imtahanı asandır. Bunu nəzərə alsaq, sertifikasiya imtahanından kəsilən müəllimlərin gələcəkdə yenidən pedaqoq olmaq şansı azdır. İşdən çıxarılan müəllimlərin dərs yükünün necə bölünəcəyinə gəlincə, deyim ki, bir qismi vakansiyaya çıxarılır, bir hissəsi isə dərs saatı az olan müəllimlərə verilir. Maaş artımı sertifikasiyada uğur qazanan müəllimin bu prosesdə kəsilən müəllimin dərs saatlarına yiyələnməsi sayəsində baş verir. O da məlumdur ki, hardasa 5000 yaxın müəllim sertifikasiyadan keçə bilmədiyi üçün işdən çıxarılıb”.

Ekspert bildirib ki, sertifikasiyadan uğur qazananların təkrara sertifikasiya imtahanları birincidən daha çətin olmaqla, bu mərhələdə də bəzi müəllimlər işindən olacaqlar:

“Onu da deyim ki, sertifikasiyada uğur qazananların əmək haqqında artım olur. Belə ki, 30 baldan artıq bal toplayanların əmək haqqı 10 faiz,  51 balı keçənlərin maaşı isə 35 faiz artır. Müəllimlərin azalması rasionallaşdırılma nəticəsində ləğv edilən, tipi dəyişdirilən, birləşdirilən məktəblərin müəllimlərinin bir qisminin işsiz qalması ilə də baş verəcək. İqtisadi baxımdan yaxşı olsa da, uzunmüddətli perspektivdə bu, elə də uğurlu görünə bilməz. Sertifikasiya və MİQ-dən uğur qazananlar əsasən gənc nəslin nümayəndələridir. Pedaqoqlar arasında gəncləşmə daha da artacaq”.