Azərbaycanda xaricdə təhsil arzulayan gənclər üçün "2022-2026 Dövlət Təqaüd Proqramı" layihəsi həyata keçirilir. Layihə çərçivəsində 350-dən çox azərbaycanlı tələbə dövlət hesabına, xarici ölkələrə göndəriləcək.

Bununla yanaşı öz hesabına əcnəbi ölkələrə üz tutan tələbələrin də sayı az deyil. Ancaq belə olan halda bəzi gənclər problemlərlə üzləşirlər. Düzgün seçilməyən ölkə, ixtisas və tanınmayan diplomlar bu gün xaricdə təhsillə bağlı ən vacib məsələlər sırasındadır.

Təhsil eksperti Adil Vəliyev Modern.az-a bildirib ki, xaricdə təhsil almaq istəyən tələbə seçdiyi ölkənin maddi vəziyyətini araşdırmalı, oradakı universitet və ixtisaslar haqqında araşdırma aparmalıdır.

"Əcnəbi ölkədə oxumaq üçün tələbələr ya dövlət hesabından yararlanır, ya da şəxsi vəsaitini xərcləyir. Ən əsası isə, universitetlərin reytinq cədvəlindəki sıraları başlıca amildir. İkinci məsələ, ixtisas seçiminin düzgün aparılmasıdır. Azərbaycandan xaricə üz tutan tələbələrin seçdiyi ixtisaslar arasında tibb, iqtisadiyyat və mühəndislik ön sıralardadır. Çünki, bu dövrün ən gəlirli sahələri  sayılır. Digər məsələ isə, kənar ölkələrdə (inkişaf etmiş və ya inkişafda olan) özəl və dövlət universitetləri arasında fərqlərin cüzi olmasıdır. Səbəb isə, universitetlərin reytinq cədvəlindəki yeri və orada yer alan ixtisaslardır".

Ekspert onu da qeyd edib ki, Azərbaycanda özəl və dövlət universitetləri arasındakı fərqlərdən biri bəzi güzəşt və imtiyazların dövlət universitetlərində keçərli olmasıdır:

"Digər tərəfdən çox valideyn və tələbələrdə diplomun tanınmaması kimi qorxunun qalmasıdır. Əsas məqam isə, Azərbaycanda özəl və ya dövlət universitetlərini bitirən tələbələrə diplomları Elm və Təhsil Nazirliyi təqdim edir. Bu diplomların tanınmasında problem yoxdur".

Sonda isə müsahibimiz tələbələrə ixtisas və ölkə seçimi ilə yanaşı, şəxsi yaşam xərclərini də düzgün planlaşdırmağı məsləhət görüb.

Zərif Sofiyeva